އިންދިރާ ގާންދީ މެމޯރިއަލް ހޮސްޕިޓަލަށް ޒިޔާރަތްކުރާނީ ކޮންމެހެން ޒިޔާރަތްކުރަންޖެހޭ ހާލަތެއް މެދުވެރިގެން ކަމަށް އެހޮސްޕިޓަލުން މިރޭ އަންގައިފިއެވެ.
ހައްޖު ކްލިނިކަށް ހާޒިރުވާ މީހުންގެ ތެރެއިން ރޯގާގެ އަލާމާތްތައް ހުންނަ މީހުންގެ އަދަދު އިތުރުވުމާ ގުޅިގެން ބަލި މީހުންނާއި މުވައްޒަފުންނާއި މުޖުތަމައުގެ ރައްކާތެރިކަން އިތުރު ކުރުމުގެ ފިޔަވަޅުތަކުގެ ތެރޭގައި ކޮންމެހެން ބޭނުންވާ ހާލަތެއްގައި ނޫނީ އެހޮސްޕިޓަލަށް ޒިޔާރަތް ނުކުރުމަށް އަންގާފައިވާއިރު، ޒިޔާރަތް ކުރާ ނަމަ، މާސްކް އަޅަން އިރުޝާދު ދީފައިވެއެވެ.
އައިޖީއެމްއެޗުން އަންގާފައިވާ ގޮތުގައި ރޯގާގެ އެއްވެސް އަލާމާތެއް ހުރި ނަމަ މާސްކު އަޅަންވާނެ ކަމަށާއި ހޮސްޕިޓަލްގައި އެއްވެ އުޅުމުން ދުރުހެލިވާން ވާނޭ ކަމަށެވެ.
އައިޖީއެމްއެޗުން ވަނީ މިއަހަރުގެ ހައްޖުގެ އަޅުކަން އަދާކުރުމަށްފަހު އެނބުރި އައި މީހުންނަށް ހާއްސަ ފްލޫ ކުލިނިކެއް ގާއިމް ކޮށްފައެވެ.
އެހޮސްޕިޓަލުގެ ކޮންސަލްޓޭޝަން ރޫމް ނަންބަރު 10 ގައި ގާއިމްކޮށްފައިވާ މިކްލިނިކުން ހިދުމަތް ދޭނީ ކޮންމެ ދުވަހެއްގެ ހެނދުނު 8:00 އިން ފެށިގެން ރޭގަނޑު 8:00 އަށް ހިދުމަތް ދެވިގެންދާނެ ކަމަށް އެހޮސްޕިޓަލުން މައުލޫމާތު ދީފައިވެއެވެ.
