ކްރިމިނަލް ކޯޓުގައި މި ވަގުތު ދޭވާނީއެއް ނެތުމުގެ ސަބަބުން ހައްދު ނުޖަހާތާ ދުވަސްތަކެއް ވެފައިވާ ކަމަށް ޕްރޮސިކިއުޓާ ޖެނަރަލްގެ ހުސައިން ޝަމީމް މިއަދު ވިދާޅުވެއްޖެ އެވެ.
މިދިޔަ މަހުގެ 26 ގައި ކްރިމިނަލް ކޯޓުން ވަނީ ހައްދު ޖެހުމުގެ ކަންކަން ތަންފީޒު ކުރަން ދޭވާނީއެއް ހޯދަން އިއުލާންކޮށްފަ އެވެ.
ވަޒީފާގެ މުސާރަ އާއި އިނާޔަތުގެ ގޮތުގައި 8،000 ރުފިޔާ ކަނޑައަޅާފައިވާއިރު، މާދަމާ އަށް އިއުލާނުގެ މުއްދަތު ހަމަވެއެވެ.
ރައްޔިތުންގެ މަޖިލީހުގެ ޖުޑިޝަރީ ކޮމިޓީގައި ޕްރޮސިކިއުޓާ ޖެނަރަލް ޝަމީމް މިއަދު ވިދާޅުވީ ހައްދުގެ ހުކުމެއް ކުރި ނަމަވެސް، ކްރިމިނަލް ކޯޓުގައި ހައްދު ޖަހާނެ މީހަކު ނެތުމުގެ ސަބަބުން އެކަން ތަންފީޒު ނުކުރާތާ ދުވަސްކޮޅެއް ވެއްޖެ ކަމަށެވެ.
ދޭވާނީއެއްގެ މަގާމު ހުސްވެފައިވާ ހުންނަތާ ކިހާ ދުވަހެއް ވެފައިވާ ކަމެއް ދޭވާނީއެއް ނެތުމުގެ ސަބަބުން ތަންފީޒު ނުވެ އޮތީ ކިހާ ހައްދުގެ ހުކުމެއް ކަމެއް ސާފުވެފައެއް ނުވެއެވެ. އިސްތިއުނާފީ ހުރިހާ މަރުހަލާއެއް ނިމުމުން ނުވަތަ އިސްތިއުފާނު ނުކުރާ ނަމަ އެއީ ނިހާއީ ހުކުމެއް ކަން ދައުލަތުން ކަށަވަރު ކުރުމަށް ފަހު ހައްދުގެ ހުކުމް ތަންފީޒު ކުރާއިރު، ހައްދުގެ ހުކުމްގެ ވާހަކަ ދެއްކެވީ ހިތަދޫ ދެކުނު ދާއިރާގެ އެމްޑީޕީގެ މެމްބަރު އިބްރާހިމް ނާޒިލް ހުކުމް ތަންފީޒު ކުރުން ކްރިމިނަލް ކޯޓުން އަމިއްލަ އަށް ކުރިއަށް ގެންދާނެ ގޮތަކާ މެދު ޕްރޮސިކިއުޓާރ ޖެނެރަލް ޝަމީމް އާއި ސުވާލު ކުރެއްވުމުންނެވެ.
މިސުވާލަށް ޖަވާބު ދެއްވަމުން ޝަމީމް ވިދާޅުވީ ހުކުމް ތަންފީޒު ކުރުމަކީ ކަރެކްޝަނަލް ސާވިސްގެ ޒިންމާއެއް ކަމަށާއި ހައްދުގެ ހުކުމް ތަންފީޒު ކުރުން ކޯޓުން އަމިއްލަ އަށް ކުރާ ސަބަބެއް އެނގިވަޑައިނުގަންނަވާ ކަމަށެވެ. އަދި ބެލެވޭ ގޮތުގައި ކްރިމިނަލް ކޯޓުން ޙައްދުގެ ޙުކުމް ތަންފީޒު ކުރަނީ އެއީ ސަގާފީ ގޮތެއްގައި އެކަން ކުރަމުން އައިސްފައިވާ ގޮތް ކަމުންނައި އެކަމާ މެދު މީހަކު މިހާތަނަށް ސުވާލެއް ވެސް އުފައްދާފައި ނެތް އެކަމާ މެދު މީހަކު މިހާތަނަށް ސުވާލެއް ވެސް އުފައްދާފައި ނެތުމުން ކަމަށެވެ.
ޒިނޭގެ މައްސަލައިގެ ފާއިތުވި 10 އަހަރުގެ ތަފާސް ހިސާބު ތަކަށް ބަލާއިރު، ސުޕްރީމް ކޯޓުގައި ޒިނޭގެ 33 މައްސަލައެއް ކުރިއަށް ގެންދިޔަ އެވެ. އެކަމަކު، އޭގެ ތެރެއިން އެއްވެސް މައްސަލައެއް ސާބިތުވެފައެއް ނުވެ އެވެ. އަދި ހައި ކޯޓުގައި 51 މައްސަލައެއް ހިންގިއިރު، ސާބިތު ނުވެ އޮތީ އެއް މައްސަލަ އެވެ. ކްރިމިނަލް ކޯޓުގައި މިދިޔަ އަހަރު މާޗްގެ ނިޔަލަށް ޒިނޭގެ 150 މައްސަލައެއް ނިންމާފައިވެ އެވެ.
