ރާއްޖޭގެ ބައެއް ރަށްރަށުގައި ޕޮލިސް ސްޓޭޝަންތައް އިމާރާތްކުރުމަށް އިންޑިއާގެ ކުންފުންޏަކަށް ފައިސާ ދިން ނަމަވެސް މަސައްކަތް ކުރިއަށް ނުދާތީ އެ ޕްރޮޖެކްޓަށް ވީ ގޮތް ބަލަން އޮޑިޓެއް ހަދަމުން އަންނަކަމަށް ޕޮލިސް ކޮމިޝަނަރު އަލީ ޝުޖާއު ވިދާޅުވެއްޖެއެވެ.
ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީގައި، ހިތަދޫ މެދު ދާއިރާގެ ޕީއެންސީގެ މެމްބަރު އަޙްމަދު އަޒާން ކުރެއްވި ސުވާލަކާ ގުޅިގެން، ސީޕީ ވިދާޅުވީ ޕޮލިސް ސްޓޭޝަންތައް އިމާރާތްކުރަން ހަވާލުކުރި ޕްރޮޖެކްޓު ކުރިއަށް ނުގޮސް، މަޑުޖެހުނު ގޮތާއި އެ މަޝްރޫޢު ހިނގައި ދިޔަ ގޮތުގެ އޮޑިޓެއް ހަދަމުން އަންނަކަމަށެވެ.
މި އޮޑިޓު ހަދަމުން އަންނަނީ ކަމާ ގުޅުން ހުރި ފަރާތްތަކާ ގުޅިގެންކަމަށާއި، އޮޑިޓް ނިމުމުން އިތުރު ތަފްސީލް ހާމަކުރެވޭނެކަމަށް ވެސް ޝުޖާއު ވިދާޅުވިއެވެ.
ޕޮލިސް ސްޓޭޝަންތައް މަރާމާތު ކުރަން ކޮންމެ އަހަރަކު ވެސް ބަޖެޓު ދޭކަމަށާއި އެކަމަކު ބަޖެޓުގެ ކޮންޓްރޯލާ ހެދި މަރާމާތުކުރުން ހުއްޓޭކަމަށް އޭނާ ވިދާޅުވިއެވެ.
ކުރީގެ ސަރުކާރުގެ ބެލުމުގެ ދަށުން އިންޑިއާގެ ކުންފުންޏަކަށް މި މަސައްކަތް ހަވާލުކޮށް، ޖަމާކުރި 3.6 މިލިއަން ޑޮލަރަށް ވީނުވީއެއް ނޭނގުނު މައްސަލަ ބަލައިދިނުމަށް އެދި ހޯމް މިނިސްޓްރީން ފުލުހުންގެ އިދާރާއަށް ހުށަހަޅައިފައިވަނީ މިދިޔަ މާރިޗުމަހުއެވެ.
