މާލޭގައި ހަށިވިއްކުމުގެ ވިޔަފާރިކުރަމުން ދަނިކޮށް އިއްޔެ ރޭ ހައްޔަރުކުރި 4 މީހުންގެ ތެރޭގައި ހިމެނޭ 3 ބިދޭސީންގެ ބަންދަށް 15 ދުވަސް ޖަހައިފިއެވެ.
މާލޭގައި ހަށިވިއްކަމުން ދަނިކޮށް އެއްޔެ ރޭ ފުލުހުން ހައްޔަރުކޮށްފައިވަނީ، ތައިލެންޑަށް ނިސްބަތްވާ ތިން އަންހެނުންނާއި ދިވެހި ފިރިހެނެކެވެ.
މި މީހުންގެ ތެރޭގައި ހިމެނޭ ދިވެހި ފިރިހެން މީހާ ވަނީ ޝަރުތު ތަކަކާއެކު ދޫކޮށްލައިފައެވެ.
އެގޮތުން މާލޭގައި ސްޕާއެއްގެ ގޮތުގައި ހިންގަމުންދާ ތަނެއްގައި އަންހެނުންތަކެއް ހަށި ވިއްކާ ކަމަށް ފުލުހުންނަށް ލިބުނު މައުލޫމާތަކާ ގުޅިގެން ހިންގި އޮޕަރޭޝަނެއްގެ ދަށުން ހައްޔަރުކުރި މި ހަތަރު މީހުންގެ ބަންދާއިމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން ދިވެހި ފިރިހެން މިހާ ޝަރުތުތަކާއެކު ދޫކޮށްލާފައިވާ ކަމަށާއި ތައިލެންޑު ތިން އަންހެނުން 15 ދުވަހަށް ބަންދު ކުރުމަށް އެ ކޯޓުން އަމުރުކޮށްފައިވާ ކަމަށް ފުލުހުން ވިދާޅުވެއެވެ.
މާލޭގައި ހަށިވިއްކުން އަންމުވަމުން އަންނަ އިރު މަދުމަދުން އަތޮޅު ތެރޭގެ ރަށްރަށުގައިވެސް ހަށިވިއްކުން ދަނީ އާންމުވަމުންނެވެ.
މިދިޔަ ފެބްރުއަރީ މަހު ހޯމް މިނިސްޓަރު އަލީ އިހުސާން ވަނީ، މާލޭ ސަރަހައްދުން އެކަނި ވެސް އެކިއެކި ނަންނަމުގައި ހަށިވިއްކުމުގެ ވިޔަފާރިކުރާ 111 ތަނެއް ފާހަގަކުރެވިފައިވާ ކަމަށް ވިދާޅުވެފައެވެ.
