އަނެއްކާވެސް ޤަވާއިދާއި ޚިލާފަށް ވިޔަފާރި ހިންގަމުން ދިޔަ ބިދޭސީންތަކެއް ހައްޔަރުކޮށްފިއެވެ.
އިމިގްރޭޝަނުން ވިދާޅުވި ގޮތުގައި އެ އިދާރާއާއި ފުލުހުންނާއި ގުޅިގެން އިއްޔެ ހަވީރު ހުޅުމާލޭ ފޭސް 1ގައި ހިންގި ”ޖޮއިންޓް ޓާސްކްފޯސް” އޮޕަރޭޝަނެއްގައި ޤަވައިދާ ހިލާފަށް ޓޭކްއަވޭ ކޮފީ ޝޮޕް ހިންގި ބިދޭސީންތަކެއް އަތުލައިގެންފައިވާކަމަށެވެ.
އެގޮތުން ޤަވާއިދާއި ޚިލާފަށް ވިޔަފާރީތައް ހިންގަމުން ދިޔަ 8 ބިދޭސީއެއް މި އޮޕަރޭޝަންގެ ތެރެއިން ހައްޔަރުކޮށްފައި ވާކަމަށް އިމިގްރޭޝަނުން ވަނީ ވިދާޅުވެފައެވެ.
ރާއްޖޭގައި ޤަވައިދާ ހިލާފަށް ވިޔަފާރި ހިންގަމުންދާ ގިނަ އަދަދެއްގެ ބިދޭސީން އުޅެއެވެ. އެފަދަ މީހުން ގިނަ ފަހަރަށް ވިޔަފާރި ހިންގަނީ ދިވެހިންގެ ނަމުގައެވެ. އަދި އެމީހުންގެ އަމިއްލަ ވިޔަފާރިތައް ވެސް ރާއްޖޭގައި މަދެއް ނޫނެވެ.
ބިދޭސީން ރާއްޖޭގައި ވިޔަފާރި ކުރުން މަނާ ދާއިރާތައް ކަނޑައަޅާ އިގުތިސާދީ ތަރައްޤީ އާއި ވިޔަފާރިއާ ބެހޭ ވުޒާރާއިން މިދިޔަ ބުރާސްފަތި ދުވަހު ވަނީ އިއުލާންކޮށްފައެވެ. އެ ލިސްޓުގައި 25 ދާއިރާއެއް ހިމެނޭއިރު، އޭގެ ތެރެއިން ބައެއް ދާއިރާތަކަކީ މިހާރު ވެސް ބިދޭސީން ހަރަކާތްތެރިވަމުން އަންނަ ދާއިރާތަކެވެ.
