ކުރިއަށް އޮތް ތަނުގައި ރައްޔިތުންގެ މަޖިލީސް ހިމެނޭހެން ގިނަ މަގާމުތަކެއްގެ މެންބަރުންގެ އަދަދު މަދުކުރައްވަން ނިންމަވާފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިހެން ވިދާޅުވީ ރޭ ޕީއެންސީ ހަރުގޭގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ. އެގޮތުން 21 ވަނަ ރައްޔިތުންގެ މަޖިލީހުން ފެށިގެން މަޖިލީހުގެ މެންބަރުންގެ އަދަދު 77އަށް މަދުކުރައްވާނެކަމަށް ރައީސް ވިދާޅުވިއެވެ.
ރައީސް ވިދާޅުވީ ރައްޔިތުންގެ މަޖިލީހާއި، ކައުންސިލްތަކާއި، އެކި ޤާނޫނުތަކުގެ ދަށުން އުފައްދާފައިވާ މުއައްސަސާތަކުގެ މެންބަރުންގެ އަދަދު މަދުކުރައްވަން ނިންމެވީ ދައުލަތުގެ ޚަރަދު ކުޑަ ކުރެއްވުމުގެ ގޮތުންކަމަށެވެ.
މީގެ އިތުރުން ވެސް ރައީސް ވިދާޅުވީ ޤައުމުގެ ކަންކަން ނިންމަން ދައުލަތުގެ އިސްވެރިޔާގެ ގޮތުގައި އެންމެ މީހަކު ހޮވާފައި ހުންނަ އިރު، ކުޑަ އާބާދީއެއް އޮންނަ ރަށެއްގެ ކައުންސިލަށް ގިނަ އަދަދެއްގެ މެންބަރުން އިންތިޚާބު ކޮށްފައި ބެއިތިއްބުމަކީ ޚަރަދު ބޮޑުވާނެ ކަމެއްކަމަށެވެ. އެހެންކަމުން ކުޑަ އާބާދީ އޮންނަ ރަށްރަށުގައި ކައުންސިލްގެ ރައީސާއި، ނައިބު ރައީސެއް ހޮވުމުން ފުދޭނެކަމަށް ދެކެވަޑައިގަންނަވާކަމަށް ރައީސް ވިދާޅުވިއެވެ. އަދި އެއަށްވުރެ ގިނަ މެންބަރުން ހޮވާނަމަ ހޮވުން ރަނގަޅީ ބޮޑެތި އާބާދީ އޮންނަ ރަށްރަށާއި ސިޓީތަކުގައިކަމަށް ރައީސް ވިދާޅުވިއެވެ.
ރައީސް ސިފަ ކުރެއްވި ގޮތުގައި މިހާރު އަތޮޅު ކައުންސިލްތައް ހޮވާފައި އޮތީ މާނަ އޮތް ގޮތެއްގައެއް ނޫނެވެ. އެހެންކަމުން އަތޮޅު ކައުންސިލް އުފައްދާ ގޮތް ބަދަލު ކުރުން މުހިންމުކަމާއި އެ ކައުންސިލްތަކަކީ ނަތީޖާ ނެރެވޭވަރުގެ ކައުންސިލްތަކަށް ހެދުމަށް ޤާނޫނަށް އިސްލާހު ހުށަހަޅުއްވާނެކަމަށް ރައީސް ވަނީ ވިދާޅުވެފައެވެ.
