މާލޭގެ ހ. ހުދުފިނިފެންމާގޭގައި ދިރިއުޅޭ މީހުން ބޭރަށް ނުނިކުމެވި ބަންދުވީ، އެ ގޯތީގެ ރެޖިސްޓްރީ ހަދާދީފައިވާ ގޮތުންކަމަށް މާލެ ސިޓީ ކައުންސިލުން ބުނެފިއެވެ.
ހ. ހުދުފިނިފެންމާގޭގައި ދިރިއުޅޭ މީހުން ބޭރަށް ނުނިކުމެވި ބަންދުވިކަމަށް ބުނާ ވީޑިއޯއެއް މިދިޔަ ބުރާސްފަތި ދުވަހު ސޯޝަލް މީޑިޔާގައި ވަނީ އާންމުވެފައެވެ.
މާލެ ސިޓީ ކައުންސިލުން އިއްޔެ ބޭއްވި ނޫސްވެރިންގެ ބައްދަލުވުމުގައި އެ ކައުންސިލުގެ ވަކީލު އަބްދުﷲ އަބަދުލް ހަކީމް ވިދާޅުވި ގޮތުގައި އެ މީހުންނަށް ގެއިން ނިކުމެވޭނެ ގޮތެއް ނުވެ ބަންދުވެފައި ވަނީ ގަވާއިދާ ޚިލާފަށް ގޭގެ ރަޖިސްޓްރީ ހަދާދިނުމުންކަމަށެވެ.
ހުދުފިނިފެންމާގޭގެ ދޮރުމަތީގައި އެގޭގެ މީހުންނަށް ވަދެނުކުމެ ނޫޅެވޭ ގޮތަށް ފާރެއް ރޭނީ، އެ ގޭގެ މީހުން ނިދާފައި ތިއްބައެވެ. ކުޑަކުދިންނާއި އުމުރުން ދުވަސްވީ މީހަކު ވެސް ހިމެނޭ އެ އާއިލާ 24 ގަޑިއިރަށް ވުރެ ގިނަ އިރު ވަންދެން އެ ގޭގައި ބަންދުވެފައި ތިއްބެވެ.
ހަކީމް ވިދާޅުވީ ހުދުފިނިފެންމާގޭގޭ އެ ގޯޅި ގަނޑުގެ މައްސަލަ ދިމާވެގެން އުޅޭތާ 27 އަހަރު މިހާރު ވެއްޖެކަމުގައެވެ.
އެ ގޯތީގެ ބޮޑުމިނަކީ 3،980 އަކަފޫޓު ކަމަށާއި އެންމެ ފުރަތަމަ އެ ގޯތި ބަހާފައި ވަނީ ދެ ބަޔަށްކަމަށް އޭނާ ވަނީ ވިދާޅުވެފައެވެ. އެއީ ހުދުފިނިފެންމާގެއާއި ހުދުދިނިފެންމާގެ އާގެއެވެ. ހަކީމް ވިދާޅުވީ އެ ގޯޅިގަނޑަކީ 320 އަކަފޫޓުގެ ގޯޅި ގަނޑެއްކަމަށާއި ހުދުފިނިފެންމާގެ އާގެއަށް 1985 އަކަފޫޓު ހިމެނެނީ އެ ގޯޅިއާ އެކުގައިކަމަށެވެ.
ހަކީމް ވިދާޅުވީ އެއަށްފަހު ހުދުފިނިފެންމާގެ ދެބައި ކުރުމަށްފަހު އެއްބަޔަށް ކުބްރާ ކިޔާ އަނެއްބަޔަށް ހުދުފިނިފެންމާގެ ކިޔުނު ކަމުގައެވެ. އަދި ދެ ބަޔަށް ވެސް ވަންނަ ގޮތައް ހަދާފައިވަނީ ހަދީބީ މަގުންކަމަށެވެ.
އަދި ހުދު ފިނިފެންމާގެ ހައްވާ އިބްރާހިމާއި ހަސަން ޝާކިރުގެ މައްޗަށް ރަޖިސްޓްރީ ކުރެވުނުކަމަށާއި މި ކަން މިހެން އޮތް އިރު ހައްވާ އިބްރާހިމަށް ނުވަދެވޭ ގޮތަށް ގޯޅިއެއް ނުކަނޑައި، ހުދު ފިނިފެންމާގެ ހަސަން ޝާކިރުގެ މައްޗަށް ރަޖިސްޓްރީ ކޮށްފައިވާކަމަށް ވެސް ހަކީމް ވަނީ ވިދާޅުވެފައެވެ.
2020 ވަނަ އަހަރު މާލެ ސިޓީ ކައުންސިލުން ހަސަން ޝާކިރުގެ މައްޗަށް ވަކި ރަޖިސްޓްރީއެއް ހަދައިފައިވާއިރު އެ ރަޖިސްޓްރީގައި އިމާރާތްކުރުމަށް ވަނީ ހުއްދަދީފައެވެ. ހަކީމް ވިދާޅުވީ ހުދުފިނިފެންމާގޭ ފަހަތުގައި އޮތް ބަޔަށް ނުވަދެވޭ ގޮތްވީ މި ރަޖިސްޓްރީ މާލެ ސިޓީ ކައުންސިލުން ހަދައިދިނުމުންކަމަށެވެ.
އަދި މިހާރު މި މައްސަލަ ހޫނުވެފައި ވަނީ ހުދުފިނިފެންމާގޭ އާގޭގެ ފާރު ރޭނުމުންކަމަށާއި ބައެއްގެ ގޭގެ އިންފާރު ރޭނުން ސިޓީ ކައުންސިލުން މަނާ ނުކުރެވޭނެކަމަށް އޭނާ ވިދާޅުވިއެވެ.
އަދި ހައްވާ އިބްރާހީމަށް އޮތް ގޯތިން މީހުން ވަދެ ނިކުންނާނެ ގޮތެއް ހަމަޖެއްސުމަށް ހަތަރު ހަފްތާގެ މުއްދަތެއް ދިންކަމަށް ވެސް އޭނާ ވަނީ ވިދާޅުވެފައެވެ.
އިއްޔެ ބޭއްވި ނޫސްވެރިންގެ ބައްދަލުވުމުގައި ސިޓީ ކައުންސިލުގެ ވަކީލް އަބްދުލް ހަކީމް ވިދާޅުވީ އެ މައްސަލަ ހައްލު ކުރީ އެ ގެއިން ގޯޅި ކަނޑަން ޖެހޭ ދިމާއިން ފާރު ތަޅާލައިގެންކަމަށެވެ. ކައުންސިލުން އެ ފާރު ތަޅާލީ ޝާކިރުގެ ބައިންނެވެ.
