މަންމާފުޅު މުއުމިނާ ޙުސައިންފުޅުގެ ޖަނާޒާގެ ކަންކަން ހަމަޖައްސަވައިދެއްވީތީ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދުއަށް ކުރީގެ ރައީސް އިބްރާހިމް މުހައްމަދު ސޯލިހް (އިބޫ) ޝުކުރުދަންނަވައިފިއެވެ.
ގިނަ ދުވަސްތަކެއް ވަންދެން އާލާސްކަންފުޅާ އުޅުއްވުމަށްފަހު ރައީސް ސޯލިހްގެ މަންމާފުޅު އަވަހާރަވެފައި ވަނީ އުމުރުފުޅުން 80 އަހަރުގައި އޭޑީކޭގައި ފަރުވާ ދެމުންދަނިކޮށް އިއްޔެ ހެނދުނުގެ ވަގުތެއްގައެވެ.
މިއަދު އެކްސްގައި ކުރެއްވި ޕޯސްޓެއްގައި ރައީސް ސޯލިހް ވަނީ މަންމާފުޅުގެ ޖަނާޒާގެ ކަންތަކުގައި ސަރުކާރުގެ ފަރާތުން މިނިސްޓަރ ޑރ. ޝަހީމް އިސްވެހުންނަވައިގެން ހަމަޖައްސަވައިދެއްވި އެންމެހާ އިންތިޒާމްތަކަށް އަމިއްލަ ނަންފުޅާއި އާއިލާގެ ފަރާތުން ޝުކުރު ދަންނަވާފައެވެ.
ރައީސް ސޯލިހް ވަނީ ޖަނާޒާގައި ބައިވެރިވެ، މަންމާފުޅަށް ހެޔޮ ދުއާ ކޮށްދެއްވި ހުރިހާ ބޭފުޅުންނަށާއި ތައުޒިޔާ ވިދާޅުވި ހުރިހާ ބޭފުޅުންނަށް ވެސް އިހްލާސްތެރިކަމާއެކު ޝުކުރު ދަންނަވާފައެވެ.
