ރައީސް ޑރ. މުހައްމަދު މުއިއްޒުއަށް ސިހުރު ހެދި ކަމުގެ ތުހުމަތުގައި އެންވަޔަރަންމަންޓް މިނިސްޓްރީގެ ކުރީގެ ސްޓޭޓް މިނިސްޓަރު ފާތިމަތު ޝަމްނާޒް އާއި އޭނާގެ ކޮއްކޮ ބަންދު ކުރި މައްސަލަ ހައިކޯޓަށް ހުށަހަޅައިފިއެވެ.
ފުލުހުން ވަނީ ކޯޓު އަމުރެއްގެ ދަށުން، ޝަމްނާޒް އާއި އޭނާގެ ކޮއްކޮ ދިރިއުޅެމުންދިޔަ އެޕާޓްމަންޓު ފާސްކޮށް ގެއިން ބައެއް ތަކެތި ގެންގޮސްފައެވެ.
މިދިޔަ މަހުގެ 23 ވަނަ ދުވަހު ޝަމްނާޒް ހައްޔަރުކުރުމަށްފަހު 20 ދުވަސްފަހުން ފުލުހުން ވަނީ އޭނާ ދޫކޮށްލާފައެވެ.
ރައީސް މުއިއްޒުއަށް ސިހުރު ހެދިކަމަށް ތުހުމަތުކޮށް ޝަމްނާޒް އާއި އޭނާގެ ކޮއްކޮ ބަންދު ކުރި މައްސަލަ ވަނީ ހައިކޯޓަށް ހުށަހަޅާފައިވާ އިރު، ފުލުހުން ދަނީ މިމައްސަލަ ތަހުގީގު ކުރަމުންނެވެ.
ރައީސް އޮފީހުގެ ތަރުޖަމާން ހީނާ ވަލީދު ވަނީ މިމައްސަލައަކީ ރައީސް އާއި އެމަނިކުފާނުގެ އާއިލާއިން ހުށަހަޅާފައިވާ މައްސަލައެއް ނޫން ކަމަށް ވިދާޅުވެފައެވެ.
މިމައްސަލަ އާއި ގުޅޭ އިތުރު އެއްވެސް މައުލޫމާތެއް ފުލުހުން އަދި ޝަމްނާޒް ވެސް ހާމަކޮށްފައެއް ނުވެއެވެ.
