ޤަވާއިދާއި ޚިލާފަށް ރާއްޖެ އެތެރެވެ މަސައްކަތް ކުރަމުންދަ ބިދޭސީންގެ މައްސަލަ ހައްލުކުރުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން އިމިގްރޭޝަނާއި ފުލުހުން ގުޅިގެން ހިންގަމުންދާ އޮޕަރޭޝަންތަކުގައި އިތުރު ހަތަރު ބިދޭސީން އަތުލައިގަނެފިއެވެ.
މިކަން ހާމަކޮށް އިމިގްރޭޝަނުން ވަނީ ބިދޭސީންގެ މައްސަލަ ހައްލުކުރުމަށް ހިންގަމުންދާ އޮޕަރޭޝަންގެ ތެރެއިން އިއްޔެ ހަވީރު މާލޭގެ ތިން ތަނެއް ބަލައި ފާސްކޮށް، އެތަންތަނުން ގަވާއިދާ ހިލާފަށް މަސައްކަތްކުރަމުން ދިޔަ ހަތަރު ބިދޭސީއަކު އިމިގްރޭޝަން ބެލުމުގެ ދަށަށް ގެނެވިފައިވާ ކަމަށް ވިދާޅުވެފައެވެ.
އިމިގްރޭޝަނާއި ފުލުހުން ގުޅިގެން ކުރިއަސް ގެންދާ އޮޕަރޭޝަންތަކުން ކުޑަ ދުވަސްކޮޅެއްގެ ތެރޭގައި ވަނީ 100ށް ވުރެ ގިނަ ބިދޭސީން އަތުލައިގަނެފައެވެ.
އަދި އެ ފަރާތްތައް ޑީޕޯޓްކުރުމުގެ މަސައްކަތް ކުރިއަށްދާ ކަމަށްވެސް އިމިގްރޭޝަނުން ވަނީ ވިދާޅުވެފައެވެ.
ނުޤަވާއިދުން އުޅޭ ބިދޭސީންގެ މައްސަލަ ހައްލުކުރަން އިމިގްރޭޝަނުން އަންނަނީ ޚާއްސަ ފިޔަވަޅުތަކެއް އަޅަމުންނެވެ. އެ މަސައްކަތް ކުރަމުން އަންނައިރު 1،800 އަށްވުރެ ގިނަ ބިދޭސީންވަނީ ގައުމަށް ފޮނުވާލައިފައެވެ.
ރާއްޖޭގައި ގިނަ މަސައްކަތްތަކެއް ކުރުމުގައި ބިދޭސީން ހަރަކާތްތެރިވާއިރު، ގަވާއިދާ ޚިލާފަށް މަސައްކަތް ކުރާ ބިދޭސީން ވެސް ރާއްޖޭގައި ގިނައެވެ. އަދި، ބިދޭސީންގެ ބެލުމުގެ ދަށުން އެކި ކަހަލަ ވިޔަފާރިތައް ވެސް ހިންގައެވެ.
ހޯމް މިނިސްޓްރީން އަންނަނީ ބިދޭސީންގެ ބަޔޮމެޓްރިކް ޑާޓާ އެއްކުރަން ވެސް ޚާއްސަ އޮޕަރޭޝަނެއް ކުރިއަށް ގެންދަމުންނެވެ.
