އިންޑިއާއިން 2025 ވަނަ އަހަރަށް ލަފާކުރާ ބަޖެޓު ކަނޑައެޅި އިރު، ކުރިން ރާއްޖެއަށް ހިލޭ އެހީގެ ގޮތުގައި ދޭން ނިންމާފައިވާ އަދަދު ކުޑަކޮށްފިއެވެ.
އިންޑިއާގެ ނޫހަކުން ހާމަކުރާ ގޮތުގައި އަންނަ އަހަރުގެ ބަޖެޓުން ރާއްޖެއަށް ހިލޭ އެހީގެ ގޮތުގައި ދޭން އިންޑިއާއިން ކުރިން ކަނޑައަޅާފައިވަނީ އެއް ބިލިއަން ރުފިޔާއެވެ. އެއީ 600 ކްރޯޑް އިންޑިއާ ރުޕީސްއެވެ. ނަމަވެސް ބަޖެޓު ކަނޑައެޅި އިރު ރާއްޖެއަށް ދިނުމަށް ކަނޑައަޅާފައިވަނީ 732 މިލިއަން ރުފިޔާއެވެ.
އިންޑިއާއިން ރާއްޖެއަށްދޭ އެހީ ކުޑަކޮށްފައިވަނީ، ޑރ. މުޙައްމަދު މުއިއްޒު ވެރިކަމަށް ވަޑައިގަތް ފަހުން ދެ ގައުމުގެ ގުޅުން ހީނަރުވުމުންކަމަށް ލަފާކުރެވެއެވެ. ރާއްޖެއާއި އިންޑިއާގެ ގުޅުން ހީނަރުވީ، މި ސަރުކާރުގެ ތިން ސްޓޭޓް މިނިސްޓަރަކު ސޯޝަލް މީޑިއާގައި މޯދީއަށް ނިސްބަތްކޮށް ދެއްކެވި ބޭއަދަބީ ވާހަކަތެއްގެ ސަބަބުންނެވެ.
އިންޑިއާގެ މި އަހަރުގެ ބަޖެޓުން އެންމެ ބޮޑު އެހީއެއް ލިބޭ ގައުމަކީ ބޫޓާނެވެ. އެއީ 2،068 ކްރޯޑް ރުޕީސްއެވެ.
މިދިޔަ އަހަރު އިންޑިއާއިން ހިލޭ އެހީގެ ގޮތުގައި ރާއްޖެއަށް 1.4 ބިލިއަން ރުފިޔާ ހަދިޔާކޮށްފައިވާކަން ފާހަގަކޮށްލެވެއެވެ.
