މާފުށީ ޖަލުގައި ހުކުމް ތަންފީޒު ކުރަމުން ދަނިކޮށް ޑްރަގް ފެނުނު މައްސަލާއިގައި ގައިދީއަކު އުމުރަށް ޖަލަށްލާން ޙުކުމް ކޮށްފިއެވެ.
މިމައްސަލާގައި ގައިދީގެ މައްޗަށް ޙުކުމް ކޮށްފައި ވަނީ ޖަލުގައި ޙުކުމް ތަންފީޒު ކުރަމުން ދަނިކޮށް 2016 ވަނަ އަހަރުގައި އެގައިދީ ލައިގެން ހުރި ބޮކްސާގެ ތެރެއިން މަސްތުވާތަކެތި ފޮރުވައިގެން އުޅެނިކޮށް ފެނުމުގެ ސަބަބުން ކަރެކްޝަންސް އިން ހިންގި އޮޕަރޭޝަނެއްގައި 30 ގްރާމަށް ވުރެ ގިނަ ޑައިމޯފިން ފެނުމުގެ ސަބަބުންނެވެ.
މިމައްސަލާއިގައި ގައިދީގެ މައްޗަށް ކޮށްފައިވާ ދައުވާއަށް އޭނާ އިންކާރު ކޮށްފައިވާއިރު ކްރިމިނަލް ކޯޓުން ކުރި ޙުކުމުގައި ވަނީ މަސްތުވާތަކެތި ފެނުނީ އޭނާ ލައިގެން ހުރި ބޮކްސާގެ ތެރެއިން ކަމަށް ވާތީ އޭނާގެ ހަގީގީ ހިޔާޒަތުގެ ދަށުން މަސްތުވާތަކެތި ފެނުނުކަން ސާބިތުވާ ކަމަށް ވަނީ ބަޔާންކޮށްފައެވެ.
މީގެ އިތުރުން އެތަނުން މަސްތުވާތަކެތި ފެނުނު ކަމަށް އޭނާ އިންކާރު ނުކުރާއިރު، އެ ތަކެއްޗަކީ މަސްތުވާތަކެތި ކަން އޭނާއަށް އެނގޭކަން ސާބިތުވާތީ އޭނާގެ މައްޗަށް ކުށް ސާބިތުވާ ކަމަށް މިދިޔަ ބުރާސްފަތި ދުވަހު ކްރިމިނަލް ކޯޓުން މިމައްސަލާއިގައި ޙުކުމް ކުރައްވަމުން ބަޔާންކޮށްފައިވެއެވެ.
އެހެންކަމުން އޭނާގެ މައްޗަށް ކުށް ސާބިތުވާތީވެ ކްރިމިނަލް ކޯޓުން ކުރެއްވި ޙުކުމްގައި ވަނީ އޭނާ އުމުރަށް ޖަލަށްލުމާ އެކު އެއް ލައްކަ ރުފިޔާއިން ޖޫރިމަނާކޮށް، އެ ފައިސާ އެއް މަސް ތެރޭގައި ދައުލަތަށް ދެއްކުމަށެވެ.
