މާލޭގެ މަގަކަށް ފަލަސްޠީނާއި ގުޅުވައިގެން ނަމެއް ކިޔުމަށް ނިންމައި “ފަލަސްޠީނު ހިނގުން” ގެ ނަމުން ނަން ދިނުމަށް ނިންމި މަގު ހެދުމުގެ މަސައްކަތް ފަށައިފިއެވެ.
މިކަން ހާމަކޮށް މާލޭ ސިޓީ ކައުންސިލުން ވަނީ އެ މަގު ހެދުމުގެ މަސައްކަތް ކުރިއަށްދާ ފޮޓޯތައް އެކްސްގައި ހިއްސާކުރައްވައިފައެވެ.
މެއި މަހު ބޭއްވި މާލޭ ސިޓި ކައުންސިލްގެ ޖަލްސާއެއްގައި މާލޭގައި އެއްވެސް ނަމެއް ނުކިޔާ ދެ މަގު އޮތްކަން ފާހަގަކުރައްވައި މާލޭގެ މޭޔަރު، އާދަމް އާޒިމް ވަނީ އެތަނުން މަގަކަށް ނޫނީ އެހެން މަގަކަށް ވެސް “ފަލަސްތީނު ހިނގުން” ކިޔުމާ މެދު މެމްބަރުންގެ ޚިޔާލަށް އައްސަވައިފައެވެ.
މޭޔަރުގެ މި ހުށަހެޅުއްވުމަށް ޖަލްސާގައި ބައިވެރިވެ ވަޑައިގެން ހުރިހާ މެމްބަރުންގެ އިއްތިފާޤުން ވަނީ ތާއިދުކުރައްވައިފައެވެ.
