ޢަމަލީ މަސައްކަތް ފެށިފައިވާ ސަރުކާރުގެ އެއްވެސް މަޝްރޫޢެއް މަޑުޖައްސާލަން އަންގާފައި ނުވާނެކަމަށް އިމާރާތްކުރުމާއި ބިނާރާބެހޭ ވަޒީރު ޑރ. އަބްދުﷲ މުއްޠޮލިބް ވިދާޅުވެއްޖެއެވެ.
ވަޒީރު މި ފަދައިން ވިދާޅުވީ ރޭގެ ވަގުތެއްގައި އެކްސްގައި ކުރެއްވި ޕޯސްޓެއްގައެވެ. އެގޮތުން އެމްޓީސީސީއާ ހަވާލުކޮށްފައިވާ މަޝްރޫޢުތަކުގެ ތެރެއިން ޢަމަލީ މަސައްކަތް މިހާރު ފެށިފައިވާ އެއްވެސް މަޝްރޫޢެއް ހުއްޓާލުމަށް އަންގާފައި ނުވާނެކަމަށް ވަޒީރު ހާމަކުރެއްވިއެވެ. އެހެންނަމަވެސް ޢަމަލީ މަސައްކަތް ފެށިފައިނުވާ މަޝްރޫޢުތަކަށްވުރެ ޢަމަލީ މަސައްކަތް ފަށާފައިވާ މަޝްރޫޢުތައް ނިންމުމަށް އިސްކަން ދިނުމަށް އަންގަވާފައިވާނެކަމަށް ވަޒީރު ވިދާޅުވިއެވެ.
މި ގޮތަށް ނިންމި މައިގަނޑު ސަބަބެއްގެ ގޮތުގައި އެ މަނިކުފާނު ފާހަގަކުރެއްވީ މި ހުރިހާ މަޝްރޫޢުތައް ކުރިއަށް ގެންދަން ބޭނުންވާ މިންވަރަށް މި އަހަރަށް ފާސްކޮށްފައިވާ ބަޖެޓުގައި ފައިސާ ހިމަނާފައި ނުވާތީއެވެ.
އެމްޓީސީސީން ކުރިއަށް ގެންދާ ސަރުކާރުގެ މަޝްރޫޢުތައް ހުއްޓާލުމަށް އެ ކުންފުންޏަށް އަންގާފައިވާކަމަށް ބުނެ ބައެއް މީޑިއާތަކުން ދަނީ ޚަބަރު ފަތުރަމުންނެވެ.
