މި އަހަރުގެ ތެރޭ ޒަކާތު ފަންޑަށް 100 މިލިޔަން ރުފިޔާ ހޯދުމަށް އަމާޒު ހިފާފައިވާކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
ޝަހީމް މިފަދައިން ވިދާޅުވީ ޕީ.އެސް.އެމުން ގެނެސްދޭ ރާއްޖެ މިއަދު ޕްރޮގްރާމްގައި ވާހަކަފުޅުދައްކަވަމުންނެވެ.
“މިދިޔަ ހައެއްކަ މަސް ތެރޭގައި 50 މިލިޔަނަށްވުރެ ގިނަ ރުފިޔާ ވަނީ ޒަކާތު ފަންޑަށް ޖަމާވެފައި. އަޅުގަނޑުމެންގެ އަމާޒަކީ އަހަރު ނިމިގެންދާއިރުގައި 100 މިލިޔަނާ ގާތްކުރުން. އެއީ ތާރީޚީ ކަމަކަށްވެގެންދާނެ، އެ އަދަދަށް އަޅުގަނޑުމެންނަށް ވާސިލުވެވިއްޖެކަމަށްވާނަމަ” ޝަހީމް ވިދާޅުވިއެވެ.
އެ ޕްރޮގްރާމްގައި ވާހަކަފުޅުދައްކަވަމުން ޝަހީމް ވިދާޅުވީ، ޒަކާތާބެހޭ ކަންކަމަށް ޚާއްސަ އިދާރާއެއް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވެރިކަމުގެ އެންމެ ކުރީކޮޅު އުފެއްދެވުމަކީ ރާއްޖޭގެ ޒަކާތުގެ ނިޒާމު އިތުރަށް ފުޅާކޮށް ފުރިހަމަކުރެއްވުމަށް އެ މަނިކުފާނު ގެންގުޅުއްވާ ތަޞައްވުރު ރަމްޒުކޮށްދޭ ކަމެއްކަމަށެވެ.
ޝަހީމް އިތުރަށް ވިދާޅުވީ ޒަކާތު ހައުސްގެ މަސައްކަތްތައް ވަރަށް ތަރުތީބުކޮށް ކުރިއަށްދާކަމަށެވެ. އަދި މިހާތަނަށް އައި އިރު ޒަކާތުގެ ކަންކަމަށް އާންމުން ހޭލުންތެރިކުރުމުގެ ތަފާތު މަސައްކަތްތައް ޒަކާތު ހައުސްގެ ދަށުން ހިންގާފައިވާނެކަމަށް ވެސް ޝަހީމް ވިދާޅުވިއެވެ.
ރާއްޖޭގައި ޒަކާތް ނެގުމާއި، ޒަކާތް ހައްގުވެރިންނަށް ބެހުމުގެ މަސައްކަތް މިހާރު ކުރިއަށް ދަނީ “ދިވެހިރާއްޖޭގެ ޒަކާތު ހައުސް”ގެ ދަށުންނެވެ. އެ އިދާރާއަކީ އިސްލާމީ ކަންތައްތަކާ ބެހޭ ވުޒާރާގެ ދަށުން ހިނގަމުންދާ އިދާރާއެކެވެ. އެ އިދާރާ ޤާއިމުކުރެވުނީ 18 ޑިސެމްބަރު 2023 ގައެވެ.
ޒަކާތު ފަންޑު ތަރައްޤީކޮށް، ޒަކާތުން ބައެއް ޝަރީޢާ ހުއްދަކުރާ ދާއިރާތަކުން އިންވެސްޓްކޮށް، ޒަކާތު ފަންޑު އިތުރުކޮށް، އޭގެ ނަފާ ބެހެނިވެރިންނަށް ފުޅާ ދާއިރާއެއްގައި ލިބޭނެގޮތް ހެދުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅެކެވެ.
