އެމެރިކާގެ ޕޮއިޒަން ސެންޓަރުގައި 3،600 އަށް ވުރެ ގިނަ ކޭސް “ޕޮއިޒަން ފިއުމް ފީވާ” ނުވަތަ “ޓެފްލޯން ފްލޫ” ނަމަކަށް ކިޔާ ރޯގާއެއް ޖެހިގެން ރިޕޯޓްކޮށްފައިވާކަމަށް ދައްކައިފިއެވެ.
މިބަލި ޖެހެން މެދުވެރިވާ އެއް ސަބަބަކީ ތަތްނުލަވާ ތެލީގައި ޓެފްލޯން ނަމަކަށް ކިޔާ ކަޅުކުލައިގެ ފަށަލައިގެ ސަބަބުން ކަމަށް ވޮޝިންގްޓަން ޕޯސްޓްގައި އޮތް ރިޕޯޓެއްގައި ވެއެވެ. މީގެ އިތުރުން އެމެރިކާގެ ޕޮއިޒަން ސެންޓާރުން ބުނާގޮތުގައި ޓެފްލޯން ފްލޫއަކީ ތަތްނުލަވާ ތެލި ގިނައިރު ދޮންވެހުރުމުން ނިކުންނަ ދުން ހަށިގަނޑުގެ ތެރެއަށް ވަނުމުން ޖެހޭ ރޯގާއެއްކަމުގައެވެ. އާނމުކޮށް ތެލީގެ ހޫނުމިން 260 ޑިގްރީ ސެލްސިއަސްއަށްވުރެއް މައްޗަށް އެރުމުން މި ނުރައްކާތެރި މާއްދާތަށް ނިކުންނަން ފަށައެވެ.
މިރޯގައިގެ އަލާމާތްތަކުގެ ތެރޭގައި ބޮލުގައި ރިއްސުން، ފިނިވުން، ހުން އައުން، މޭނުބައި ކުރުން، ފުއްޕާމޭ ފިތިފަހުރުން، ކެއްސުން އަދި ކަރުތެރެ ދުޅަވުން ހިމެނެއެވެ.
މިފަދަ ތަތްނުލަވާ ތަވާގައި ހުންނަ ނުރައްކާތެރި މާއްދާތައް ހަށިގަނޑަށް ދާއިމަށް ވަންނަނަމަ މީ ކަންބޮޑުވާން ޖެހޭކަމެއް ކަމުގައި އިންޑިއާގެ ގްލެނީގަލްސް ހޮސްޕިޓަލްގެ އެތެރެހަށީގެ ސީނިއާ ޑޮކްޓަރެއް ކަމަށްވާ ޑޮކްޓަރ ހަރީޗަރަން ވިދާޅުވިއެވެ. ސަބަބަކީ އެއީ ތައިރޮއިޑް، ބައެއް ކެންސަރ އަދި ދަރިމަނުވުމުގެ ބަލިތަކަށް އަސަރުކުރާ މާއްދާއެއް ކަމަށްވާތީކަމަށްވެސް ޑޮކްޓަރ ދެންނެވިއެވެ. އަދި މިފަދަ ރޯގާތަކުން ދުރުވުމަށް ތަތްނުލަވާ ތަވާގައި އެހާ ގިނި ގަދަ ނުކޮށް ކެއްކުން މުހިއްމެވެ. ނުވަތަ ތަތްނުލަވާ ތެލީގެ ބަދަލުގައި ސްޓެއިންލެސް ސްޓީލް ނުވަތަ ކާސްޓް އަޔަން ތެލި ބޭނުން ކުރުން އެދެވިގެންވެއެވެ.
