އެމްޓީސީސީގެ އާމްދަނީ މި އަހަރުގެ ދެ ވަނަ ކުއާޓަރުގައި ބޮޑުތަނުން ދަށް ވެއްޖެއެވެ.
މިއަހަރުގެ ފުރަތަމަ ކުއާޓާގައި އެކުންފުންޏަށް 664 މިލިއަން ރުފިޔާގެ އާމްދަނީއެއް ލިބިފައިވާއިރު، މިއަހަރުގެ ދެވަނަ ކުއާޓާ ގައި އެކުންފުންޏަށް ލިބިފައިވަނީ 497 މިލިއަން ރުފިޔާ އެވެ. މިއީ މިއަހަރުގެ ފުރަތަމަ ކުއާޓާ އާއި އަޅާ ބަލާއިރު، 25 ޕަސެންޓް ދަށް އަދަދެކެވެ.
ހުސްވި އަހަރުގެ ތަފާސް ހިސާބުތަކަށް ބަލާލާއިރު، އެއަހަރުގެ ދެވަނަ ކުއާޓާގައި އެކުންފުންޏަށް 727 މިލިއަން ރުފިޔާގެ ފައިދާއެއް ލިބިފައިވެއެވެ. އަދި މިދިޔަ އަހަރުގެ ދެވަނަ ކުއާޓާގެ އާމްދަނީ އާއި މިއަހަރުގެ އާމްދަނީއަށް ބަލާލާއިރު، މިއަހަރު 32 ޕަސެންޓުން ދަށްކަން ފާހަގަކުރެވެއެވެ.
މިހާ ބޮޑުތަނުން ކުންފުނީގެ އާމްދަނީ ކުޑަވެފައި މިވަނީ ކުންފުނީގެ ހަރަދުތައް ބޮޑުވެ، މާކެޓިން އާއި އެޑްމިނިސްޓްރޭޓިވް ހަރަދުތައް މިއަހަރުގެ ފުރަތަމަ ކުއާޓާ އާއި އަޅާ ބަލާއިރު ބޮޑުވެ، އިތުރުވެފައިވާތީވެ އެވެ.
މިއަހަރުގެ ފުރަތަމަ ކުއާޓާގައި އެމްޓީސީސީ އަށް ފަސް މިލިއަން ރުފިޔާގެ ފައިދާއެއް ލިބިފައިވާއިރު، މިދިޔަ އަހަރު 97 މިލިއަން ރުފިޔާ އެ ކުންފުންޏަށް ފައިދާގެ ގޮތުގައި ވަނީ ލިބިފައިވެ އެވެ.
