ޑޮކްޓަރަށް ދެއްކުމަށް އެޕޮއިންޓްމަންޓް ހޯދުމުގައި ދިމާވާ ދަތިތައް ހައްލުކުރުމަށް، އެޕޮއިންޓްމަންޓް ހަމަޖެހުނު ދުވަސް ދުރާލާ އެނގޭނެ އެޕޮއިންޓްމަންޓް ސިސްޓަމެއް ގާއިމުކުރުމުގެ މަސައްކަތް އިންދިރާގާނދީ މެމޯރިއަލް ހޮސްޕިޓަލް (އައިޖީއެމްއެޗް)އިން ފަށައިފިއެވެ.
އައިޖީއެމްއެޗްއާއި ދަރުމަވަންތަ ހޮސްޕިޓަލްގެ ޑެޕިއުޓީ ޗީފް އެގްޒެކްޓިވް އޮފިސަރ ޑރ. ޝާހު މާހިރު ރާއްޖޭގެ ނޫހަކަށް ދިން އިންޓަވިއުއެއްގައި ވިދާޅުވީ ޑޮކްޓަރަށް ދެއްކުމަށް އެޕޮއިންޓްމަންޓް ހޯދުމުގައި ދިމާވާ ދަތިތަކުގެ ޝަކުވާތައް ނިމުމަކަށް ގެނައުމަށް އެޕޮއިންޓްމަންޓް ހަމަޖެހުނު ދުވަސް ދުރާލާ އެނގޭނެ އެޕޮއިންޓްމަންޓް ސިސްޓަމެއް ގާއިމުކުރުމުގެ މަސައްކަތް އެ ހޮސްޕިޓަލުން މިހާރު ފަށާފައިވާކަމަށެވެ.
އައު އެޕޮއިންޓްމަންޓް ސިސްޓަމްގައި ވެއިޓް-ލިސްޓް ކުރާ މީހުން ތާރީޚުތަކަކަށް ބަހާލެވި، ކޮންމެ މީހަކަށް ވެސް އެ މީހަކު ޑޮކްޓަރަށް ދައްކަން އަންނަން ޖެހޭނެ ތާރީޚު ވެއިޓް-ލިސްޓް ކުރާ ދުވަހު އެންގޭނެއެވެ.
މިހާރު އެ ހޮސްޕިޓަލުން އަމަލުކުރަމުންދާ ގޮތުގެ ސަބަބުން ވެއިޓް-ލިސްޓް ކުރާ މީހުންނަށް ޑޮކްޓަރަށް ދެއްކޭނީ ސީދާ ކޮން ދުވަހަކުންކަން އެނގޭކަށް ނޯވެއެވެ. މި ކަމުގެ ސަބަބުން މާލެއާ ދުރު ރަށްރަށުން ޑޮކްޓަރަށް ދައްކަން އަންނަ ގިނަ ބަޔަކަށް ގިނަ ގޮންޖެހުންތަކެއް ކުރިމަތިވެއެވެ. ޑރ. ޝާހު ވިދާޅުވި ގޮތުގައި މި ފަދަ ސިސްޓަމަކަށް ދިޔުމުގެ ސަބަބުން ރަށްރަށުން ޑޮކްޓަރަށް ދައްކަން އަންނަ މީހުންނަށް ފަސޭހައިން ޑޮކްޓަރަށް ދެއްކޭނެ ނިޒާމެއް ފަހިކޮށްދެވޭނެއެވެ.
