ރައްޔިތުންގެ މަޖިލިހުގެ މިއަދުގެ ޖަލްސާގައި ކުރާނެ އިތުރު މަސައްކަތްތަކެއް ނެތުމުން ޖަލްސާ ކުރުކޮށްލައިފިއެވެ.
މިއަދު އޮތް 20 ވަނަ ރައްޔިތުންގެ މަޖިލީހުގެ 23 ވަނަ ޖަލްސާގެ ފުރަތަމަ އެޖެންޑާއެއްގެ ގޮތުގައި އޮތީ ގެދޮރުވެރިކަމާއި ބިމާއި އުމްރާނީ ތަރައްޤީ އާއި ބެހޭ ވަޒީރު ޑރ.އަލީ ހައިދަރާއި ސުވާލު ކުރެއްވުމެވެ. އެހެން ނަމަވެސް އާއިލީ ސަބަބަކާއި ހުރެ ވަޒީރު ހައިދަރުއަށް މިއަދުގެ ޖަލްސާއަށް ހާޒިރުވެވަޑައިގެންނެވެން ނެތްކަން މަޖިލީހަށް ވަނީ އަންގާފައެވެ.
މިއަދުގެ ޖަލްސާގައި ގުޅީފަޅުން ބިން ލިބުނު ފަރާތްތަކަށް އިން ވަކިކޮށް ބިން ހަވާލުކުރަން ފެށޭނެ ތާރީޚަކާއި ބިންވެރިޔާ ސްކީމްގެ ދަށުން ރައީސް އިބްރާހީމް މުޙައްމަދު ޞޯލިޙްގެ ސަރުކާރުން މާލޭ މީހުންނަށް ބޯހިޔާވަހިކަން ފޯރުކޮށްދިނުމުގެ ގޮތުން ދީފައިވާ ގޯތިތައް އޭގެ ވެރިފަރާތްތަކާ ހަވާލުކުރެވޭނެ ތާރީޚަކާއި ހުޅުމާލެ 2 ވަނަ ފިޔަވަހީގައި ޢިމާރާތްކުރަމުންދާ 4000 ފްލެޓް ކާމިޔާބުވީ ފަރާތްތަކަށް އެ ފްލެޓްތައް ހަވާލުކުރެވޭނެ ތާރީޚަކާއި ގުޅޭގޮތުން ސުވާލުކުރެއްވުމަށް އޮތީ ހަމަޖެހިފައެވެ.
ދެވަނަ އައިޓަމެއްގެ ގޮތުގައި ޖަލްސާގައި އެޖެންޑާ ކުރެވިފައި އޮތީ، ކޮމިއުނިކޭޝަންސް އޮތޯރިޓީ އޮފް މޯލްޑިވްސްގެ ،2016 ،2017 ،2018 2019 އަދި 2020 ވަނަ އަހަރުގެ އޮޑިޓް ރިޕޯޓު މާލިއްޔަތު ކޮމިޓީން ދިރާސާކޮށް ނިންމިގޮތުގެ ރިޕޯޓު ހުށަހަޅައި އެޔަށް ބަހުސް ކުރުމެވެ. ހަމައެއާއެކު ފެމިލީ ޕްރޮޓެކްޝަން އޮތޯރިޓީގެ ،2014 ،2017 ،2018 ،2019 ،2020 ،2021 2022 އަދި 2023 ވަނަ އަހަރުގެ އޮޑިޓް ރިޕޯޓު މާލިއްޔަތު ކޮމިޓީން ދިރާސާކޮށް ނިންމިގޮތުގެ ރިޕޯޓަށްވެސް ބަހުސް ކުރުމަށް ޖަލްސާގައި އޮތީ އެޖެންޑާ ކުރެވިފައެވެ.
އެހެން ނަމަވެސް މި ދެ ރިޕޯޓަށްވެސް ބަހުސް ކުރައްވާނެ މެމްބަރަކު ވަނީ ނުވެފައެވެ.
މިއަދުގެ ޖަލްސާއަށް އެޖެންޑާކޮށްފައިވާ ހުރިހާ މަސައްކަތެއް ނިމުމުން އިތުރު ކަމެއް ނެތުމުން މަޖިލީހުގެ ރައީސް އަބްދުލްރަހީމް އަބްދުﷲ ވަނީ މަޖިލިހުގެ ޖަލްސާ ކުރުކޮށްލައިފައެވެ.
އަދި ދެން ކުރިއަށް އޮންނާނީ ވޯޓަށް އެހުންކަމުގައިވެސް ރައީސް ވިދާޅުވިއެވެ.
