މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ހިންގުމުގެ އޮނިގަނޑަށް ބޮޑެތި ބަދަލުތަކެއް ގެނައުމަށް އެމްއެމްއޭގެ ބޯޑުން ފާސްކޮށްފިއެވެ.
މި ބަދަލު ގެނައުމަށް އެމްއެމްއޭގެ ބޯޑުން ނިންމާފައިވަނީ އެމްއެމްއޭއަކީ ޒަމާނީ ސެންޓްރަލް ބޭންކަކަށް ހެދުމުގެ ބޭނުމުގައެވެ. އެގޮތުން 5 ދާއިރާއަކުން 5 މެނޭޖިން ޑިރެކްޓަރުން އައްޔަނުކުރުމަށް ކަނޑައެޅުމަށް އެ ބޭންކުގެ ބޯޑުން ވަނީ ނިންމާފައެވެ. މީގެ އިތުރުން އެސިސްޓެންޓް ގަވަރުނަރުގެ މަގާމު، މެނޭޖިން ޑިރެކްޓަރުގެ މަގާމަށް ބަދަލުކުރުމަށް ވެސް ވަނީ ނިމްމާފައެވެ.
ކުރިން އެސިސްޓެންޓް ގަވަރުނަރުގެ މަގާމު ފުރުއްވި ބޭފުޅުން މި ބަދަލާއެކު ވަނީ އެޑްވައިޒަރުންގެ މަގާމަށް ޕްރޮމޯޓްވެފައެވެ.
އެމްއެމްއޭގެ އޮފިޝަލަކު ރާއްޖޭގެ ނޫސްތަކަށް ދެއްވި ބަސްދީގަތުމެއްގައި ވިދާޅުވެފައިވާ ގޮތުގައި 5 އަހަރު ދުވަހުގެ މުއްދަތަށް ހޮވޭ މެނޭޖިން ޑިރެކްޓަރުގެ މަގާމަށް ކުރިމަތިލުމުގެ ފުރުޞަތު އެމްއެމްއޭގައި މަސައްކަތްކުރާ ފަރާތްތަކާއި އެ ނޫން ވެސް ފަރާތްތަކަށް އޮންނާނެހެން ވަރަށް އަވަހަށް ހުޅުވާލެވިގެންދާނެއެވެ. މީގެ ސަބަބުން އެމްއެމްއޭގައި މިހާރު ތިބި ގާބިލު ފަރާތްތަކަށް އާ ފުރުސަތުތައް ހުޅުވޭނެކަމަށާއި ފަންނީ ގާބިލު މީހުންނަށް އެމްއެމްއޭއަށް ވަނުމަށް ވެސް ފުރުސަތު ހުޅުވޭނެކަމަށް އެމްއެމްއޭގެ އޮފިޝަލު ވިދާޅުވެފައިވެއެވެ.
މި ބަދަލުތައް ގެންނަން ނިންމާފައި ވަނީ އެމްއެމްއޭގެ ބޯޑުގެ މަޝްވަރާގެ މަތިން އެމްއެމްއޭގެ ގަވަރުނަރުކަމުގެ މަޤާމަށް އަލަށް އައްޔަނު ކުރެވުނު އަޙްމަދު މުނައްވަރެވެ.
