ސިއްހީ ދާއިރާގެ އެކި ކަންކަމަށް ދައްކަން ޖެހޭ 300 މިލިއަނެއްހާ ރުފިޔާ ކުރީ ސަރުކާރުން ދައްކާފައި ނުވާ ކަމަށް ހެލްތު މިނިސްޓަރު ޑރ. އަބްދުﷲ ހަލީލް ވިދާޅުވެއްޖެއެވެ.
މިނިސްޓަރު މިހެން ވިދާޅުވެފައި ވަނީ މިއަދު ރައްޔިތުންގެ މަޖިލީހުގެ ޖަލްސާގައި ކެންދޫ ދާއިރާގެ މެންބަރު މައުރޫފް ޒާކިރު ހޮސްޕިޓަލުތަކާއި ސިއްހީ މަރުކަޒުތަކަށް ބޭނުންވާ ކޮންޒިއުމަބަލްސް އަދި ފާމަސީތަކަށް ބޭނުންވާ އެންމެ އާދައިގެ ބޭސް ލިބުމުގައި ކުރިމަތިވާ ދަތިތައް ހައްލު ކުރުމަށް މިނިސްޓްރީން ކުރާ މަސައްކަތާއި ގުޅޭ ގޮތުން ސުވާލު ކުރެއްވުމުންނެވެ.
މެންބަރު ކުރެއްވި ސުވާލުގެ ޖަވާބުގައި މިނިސްޓަރު ވިދާޅުވީ ކޮންޒިއުމަބަލްސް ހުސްވުމަކީ އަބަދުވެސް ދިމާވާ މައްސަލައެއް ކަމަށެވެ. އެހެން ނަމަވެސް މިކަމަށް ދާއިމީ ހައްލެއް ހޯދުމުގެ މަސައްކަތް ކުރަމުން އަންނަ ކަމަށާއި އެކަމަށްޓަކައި އެސްޓީއޯއާއެކު ވެސް މަޝްވަރާތައް ކުރަމުން އަންނަ ކަމަށެވެ.
މީގެއިތުރުން، މިސަރުކާރުން ވެރިކަމާއި ހަވާލުވިއިރު ސިއްހީ އެކި ކަންކަމަށް އެސްޓިއޯއަށް ދައްކަންޖެހޭ 300 މިލިއަނެއްހާ ރުފިޔާ ނުދައްކާހުރި ކަމަށާއި މިސަރުކާރުން މިފައިސާގެ ބޮޑު ބައެއް މިހާރު ދައްކާފައިވާ ކަމަށް މިނިސްޓަރު ވިދާޅު ވިއެވެ. މީގެ ސަބަބުން ވެސް އެސްޓީއޯއިން ފޮރުކޮށްދޭ ކޮންސިއުމަބަލްސް ފޮރުކޮށްދިނުމަށް މިހާރު ފަސޭހަވާނެ ކަމަށް މިނިސްޓަރު ވިދާޅުވި އެވެ.
ހޮސްޕިޓަލްތަކާ، ސިއްހީ ހިދުމަތްދޭ ތަންތަނުގައި މަދުވާ އެއްޗެއްސާއި ހުރި އެއްޗެހި ދެނެގަތުމަށްޓަކައި ސިއްހީ ދާއިރާގައި މަސައްކަތް ކުރާ ޕްރައިވެޓް ސެކްޓަރުތަކުގެ ފަރާތްތަކާއެކު ސޮފްޓްވެއާއެއް ޑިވެލޮޕް ކުރަމުގެ މަސައްކަތް ކުރަމުން އަންނަ ކަމަށް ވެސް މިނިސްޓަރު ވިދާޅުވި އެވެ.
