ހުޅުމާލޭގެ ދުވާރުމަތީގައި ހުންނަ ގޮނޑިތައް ނެގުމުގެ މަސައްކަތް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ން ރަސްމީކޮން ފަށައިފިއެވެ.
އެޗްޑީސީން މި ކަމަށް ނުކުންނަން ޖެހުނީ ހުޅުމާލޭގެ މަގުތަކުގެ ޕޭމަންޓް މަތީގައި ގޮނޑި އަދި މޭޒު ބަހައްޓައިގެން ކެފޭތަކުން ޚިދުމަތް ދިނުން ހުއްޓާލުމަށް އެންގުމުން ވެސް އެ ޚިދުމަތްތަކަށް ބަދަލެއް ނައުމުންނެވެ.
އެޗްޑީސީން މި ކަމާ ގުޅިގެން އެކްސްގައި ކުރި ޕޯސްޓެއްގައި ބުނީ މި މަސައްކަތް ކުރަން އެ ކުންފުނިން ނުކުތީ ހުޅުމާލެއަކީ ހިތްފަސޭހަ ތަނަކަށް ހެދުމަށް ކުރެވޭ މަސައްކަތްތަކުގެ ތެރެއިންކަމަށެވެ. އެޗްޑީސީން މި މަސައްކަތް ކުރިއަށް ގެންދަނީ ފުލުހުންނާ ގުޅިގެންނެވެ.
މަގުތަކުގެ ދުވާރުތައް މަތީގައި މޭޒުތައް ބަހައްޓައިގެން ޚިދުމަތްދިނުން ހުއްޓާލުމަށް މިދިޔަ މަހު އެޗްޑީސީން ވަނީ އާންމުކޮށް އަންގާ، އިއުލާނުކޮށްފައެވެ.
ޕޭމަންޓާއި ހެޖް ތެރޭގައި މޭޒު އަދި ގޮނޑި ބަހައްޓައިގެން ވިޔަފާރި ކުރާ ފަރާތްތަކުގެ ސަބަބުން އާންމުންނަށް އެކި ވަރުގެ އުނދަގޫތައް ކުރިމަތިވެއެވެ.
