ރައީސް އިބްރާހީމް މުހައްމަދު ޞާލިހްގެ ސަރުކާރުން ފެށި ބޯހިޔާވަހިކަމުގެ މަޝްރޫޢުކަމަށްވާ ބިންވެރިޔާ ސްކީމުގެ ގޯތި ލިބުނު އެއްވެސް މީހަކު މަރުވެފައިވާނަމަ އަދި މަރުވެއްޖެ ނަމަ، އެ ގޯތި އެ މީހެއްގެ ވާރިސުންނަށް ލިބޭނެކަމަށް ހައުސިންގް މިނިސްޓްރީން ބުނެފިއެވެ.
ބިންވެރިޔާ ސްކީމުގެ ގޯތި ދިނުމާއި ގުޅޭގޮތުން ހައުސިން މިނިސްޓްރީން މިއަދު ނެރުނު އިއުލާނެއްގައި ބުނެފައިވަނީ ބިންވެރިޔާ ސްކީމްގެ ދަށުން ބިން ލިބިފައިވާ ފަރާތްތަކުގެ ތެރެއިން އެޕްލިކަންޓެއް ނުވަތަ އެޕްލިކަންޓް މަރުވެފައިވާ ފަރާތްތަކުން ޝަރުއީ ކޯޓުން ވާރިސުން ސާބިތުކޮށްދީ، ގަޒިއްޔާ ނިމުނު ގޮތުގެ ރިޕޯޓު މިނިސްޓްރީގެ ހިޔާވެހި ޕޯޓަލަށް ހުށަހަޅައި އެޕޮއިންޓްމަންޓަށް އެދުމުން އެއްބަސްވުމުގައި ސޮއިކުރުމުގެ އިންތިޒާމު ހަމަޖައްސައިދެވޭނެ ކަމަށެވެ.
މިދިޔަ ސަރުކާރުގެ ބިންވެރިޔާ ސްކީމްގެ ފުރަތަމަ ފިޔަވަހީގެ ދަށުން ގޯތި ދޫކުރަނީ ގިރާވަރުފަޅާއި ގުޅިފަޅުގެ އިތުރުން ހުޅުމާލެ ހިއްކައިގެންނެވެ.
އެގޮތުން މި ގޯތިތަކަށް އެދި ހުށަހެޅި ފަރާތްތަކުގެ ތެރެއިން 18،955 ފަރާތެއްގެ ޝަރުތު ހަމަވެފައިވާއިރު އޭގެ ތެރެއިން 9،0003 މީހަކަށް ގޯތި ދިނުމަށް އޭރުގެ ސަރުކާރުން ވަނީ ނިންމައިފައެވެ.
ބިންވެރިޔާ ސްކީމުގެ ތެރެއިން ދޫކުރާ ގޯތިތަކުގެ ތެރެއިން ޖުމުލަ 624 ގޯތި މިހާތަނަށް ދޫކޮށްފައިވާކަމަށް ހައުސިންގް މިނިސްޓްރީން ބުނެއެވެ.
ހައުސިން މިނިސްޓަރު ޑރ. އަލީ ހައިދަރު އިއްޔެ ރައްޔިތުންގެ މަޖިލީހުގައި ވިދާޅުވީ، ހުޅުމާލެ ދެވަނަ ފިޔަވަހިން ދޭންޖެހޭ ހުރިހާ ގޯއްޗެއް އޮކްޓޯބަރު މަހުގެ ނިޔަލަށް ހަވާލުކުރެވޭނެ ކަމަށެވެ.