ތިލަ މާލޭ ބްރިޖްގެ މަސައްކަތް އެއްކޮށް ނިންމާ ނުލެވެނީ ގުޅީ ފަޅުން ގޯތި ދޫކުރުން ވެގެންދާނީ ބޮޑެތި މައްސަލަތަކެއް އުފެދޭނެކަމެއް ކަމަށާއި އެކަމުގެ ސަބަބުން ބޮޑެތި ގޮންޖެހުން ތަކާއި ކުރިމަތވެގެންދާނެ ކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެއެވެ.
ރައްޔިތުންގެ މަޖިލިހުގެ ޖަލްސާއަށް މިއަދު ވަޑައިގެން ބިންވެރިޔާ ސްކީމުގެ ގޯތިތަކާއި ގުޅިގެން މަޖިލިހުގެ މެމްބަރުން ކުރެއްވި ސުވާލުތަކަށް ޖަވާބު ދެއްވަމުން މިނިސްޓަރ ވިދާޅުވީ، ގުޅީފަޅުން ގޯތިތައް ދޫކުރުމާއި ގުޅޭގޮތުން ހައުސިން މިނިސްޓްރީއާއި ކަންބޮޑުވުން ފާޅުކޮށްފައިވާނެ ކަމަށެވެ.
އެގޮތުން ގުޅީފަޅުން ހިއްކަންޖެހޭ ބިން ހިއްކައި ނިމިފައިވިޔަސް އެތަނުގައި ގޮނޑުދޮށް ހިމާޔަތްކުރުމުގެ މަސައްކަތްތައް އަދިވެސް ކުރިއަށްދާކަން ފާހަގަކުރައްވައި މިނިސްޓަރ ވިދާޅުވީ، ބްރިޖްއާއި ގުޅޭ ހައިވޭގެން މަސައްކަތްވެސް ފެށެން އަންނަނީ ގޮނޑުދޮށް ހިމާޔަތްކުރުމުގެ މަސައްކަތް ނިމިގެން ކަމަށެވެ.
އެގޮތުން ބްރިޖްގެ މަސައްކަތައް ގުޅީފަޅުން ބޮޑު ސަރަހައްދެއް ސައިޓް ހެދުމަށް ދީފައި ވަނިކޮށް އެތަނުން ގޯތި ދޫކޮށްފި ނަމަ ދެން އެ ސައިޓުތަކުން ގޯތިތަކުގެ ކުލި ނަގަންފަށައިފި ނަމަ ވަރަށް ބޮޑެތި ޤާނޫނީ މައްސަލަތައް ކުރިމަތިވެގެން ދާނެކަމުގައި މިނިސްސޓަރ ފާހަގަކުރެއްވިއެވެ.
ފެނާއި ނަރުދަމާ އަދި ކަރަންޓާއި މަގުތައް ނަހަދާ އޮއްވައި ބަޔަކު އެތަނަށް އަރައި އުޅެން ފަށައިނަމަ އެތަނުގައި ޕްރޮޖެކްޓް ކުރިއަށް ގެންދިއުމަށް ވެސް އަދި ސަލާމަތީ ކަންކަން ކުރިއަށް ގެންދިއުމަށް ވަރަށް ބޮޑެތި ދަތިތަކެއް ކުރިމަތިވާނެ. ބްރިޖްގެ މަސައްކަތް ކުރިއަށް ދަނިކޮށް އެތަނަށް ބަޔަކު އަރައި މަސައްކަތް ކުރަން ފަށައިފިނަމަ އެއީ ޕްރޮޖެކްޓް ކުރިއަށް ގެންދިއުމަށް ވަރަށް ބޮޑު ދަތިކަމަކަށްވާނެ -މިނިސްޓަރ
މުއްތަލިބު ވިދާޅުވީ މިނިސްޓްރީއިން މަސައްކަތްކުރަނީ ފެނާއި ނަރުދަމާގެ އެތަނުގައި ގާއިމްކޮށް އަދި ބްރިޖްގެ މަސައްކަތް ވެސް އަވަހަށް ނިންމުމަށް ކަމަށެވެ.
