މާލޭގެ ގެސްޓް ހައުސްއަކަށް ވަދެ ވަޅިން ބިރު ދައްކައި ފައިސާ އާއި ފޯނުތަކެއް ފޭރިގަނެފި އެވެ.
މާފަންނުގައި ހުންނަ ގެސްޓް ހައުސްއަކާއި ސެލޫނެއްގެ ގޮތުގައި ބޭނުންކުރާ ތަނަކަށް މީހަކު ވަދެ ފޭރުނު މައްސަލައެއް ރޭ 21:59 ހާއިރު ފުލުހުންނަށް ރިޕޯޓް ކޮށްފައިވާ ކަމަށް ފުލުހުން ވަނީ ބުނެފައެވެ.
ފުލުހުން ބުނެފައިވާ ގޮތުގައި މިހާތަނަށް ބެލިބެލުމުން އެތަނުން ފޭރިފައި ވަނީ ދެ މޯބައިލު ފޯނާއި ފައިސާ އެވެ.
މައުލޫމާތު ލިބިފައިވާ ގޮތުގައި އެމީހުން އެގެސްޓް ހައުސްއަށް ވަދެފައި ވަނީ ހުސް ކޮޓަރި ލިބެން ހުރިތޯ ބެލުމަށް ކަމަށާއި ކޮޓަރި ލިބެން ނެތް ކަމަށް ބުނުމުން ތަން ދޫކޮށް ނުގޮސް ކައުންޓަރުގައި އިން އަންހެން ކުއްޖާ އަށް ވަޅިން ބިރުދެއްކުމަށްފަހު މޯބައިލު ފޯނާއި ފައިސާ ފޭރުނީ އެވެ.
މިމައްސަލަ އާއި ގުޅިގެން އަދި މިހާތަނަށް މީހަކު ހައްޔަރުކޮށްފައިވާ ނުވާއިރު، ފުލުހުން ދަނީ މިމައްސަލަ ތަހުގީގު ކުރަމުންނެވެ.
