40،000ށް ވުރެ ބޮޑު މުސާރައިގައި ދިވެހިރާއްޖޭގެ ބާ ކައުންސިލަށް (އެސްޖީ)އަކު ހޯދުމަށް އިއުލާނުކޮށްފިއެވެ.
މީގެ ކުރިންވެސް ބާ ކައުންސިލަށް އެސްޖީއަކު ހޯދުމަށް މި މަހުގެ 5 ވަނަ ދުވަހު ކުރި އިއުލާނާއި ގުޅިގެން އެކަށީގެންވާ ވަރަށް ތަރުހީބު ލިބިފައި ނުވުމާއި ގުޅިގެން އެ ފުރުސަތަށް އަލުން ހުޅުވާލިކަމިގައިވެސް ބާ ކައުންސިލުން ކުރި އިއުލާނެއްގައި ވަނީ ބުނެފައެވެ.
އެއް އަހަރު ދުވަހުގެ މުއްދަތަކަށް ބާ ކައުންސިލަށް އެސްޖީއަކު ހޯދަނީ 40،500ރުފިޔާގެ މުސާރައަކަށެވެ.
އެ މަޤާމަށް ހޮވޭ ފަރާތަކަށް މުސާރައިގެ އިތުރުން މަސައްކަތާއި ގުޅޭ އެހެނިހެން އެލެވެންސްތަކާއި ރާއްޖޭގެ ޕެންޝަނާއި ބެހޭ ޤާނޫނުގެ ދަށުން ޕެންޝަން ކޮންޓްރިއުބިއުޝަން ވެސް ލިބޭނެ ކަމަށް ބާ ކައުންސިލުން ކުރި އިއުލާނުގައި ވަނީ ބުނެފައެވެ.
ބާ ކައުންސިލަށް ނަގާ އެސްޖީގެ ޝަރުތުތައް:
- ޤާނޫނީ ދާއިރާއިން ފުރަތަމަ ޑިގްރީ ހާސިލުކޮށްފައިވާ މީހަކަށްވުން
- ޤާނޫނީ ވަކީލެއްގެ ގޮތުގައި ހަތް އަހަރުގެ ތަޖުރިބާ ހުރުން
- ޤާނޫނީ ދާއިރާގައި ކޮށްފައިވާ މަސައްކަތްތަކުގެ ތެރޭގައި އެ މީހެއްގެ ނަޒާހަތްތެރިކަމާއި މެދު ސުވާލު އުފެދޭ ފަދަ މައްސަލައެއް ކޯޓަކަށް ނުވަތަ އެކައުންސިލަކަށް ސާބިތުވެފައިވާ މީހެއް ކަމުގައި ނުވުން
- ބަނގުރޫޓުވެފައިވާ މީހެއް ކަމުގައި ނުވުން
- ޖިނާއަތުގެ ކުށެއް ސާބިތުވެފައި ނުވާ މީހަކަށްވުން
ބާ ކައުންސިލްގެ އެސްޖީ ކަމަށް ކުރިމަތިލުމުގެ ފުރުސަތު ހަމަވާނީ މިމަހުގެ 26 ވަނަ ދުވަހު ކަމަށް ވެސް ވަނީ ބުނެފައެވެ.
