ޤަވާއިދާއި ޚިލާފަށް އުޅޭ ބިދޭސީންގެ މައްސަލަ ހައްލުކުރުމަށް ކުރަމުން އަންނަ މަސައްކަތުގެ ދަށުން މާލޭގެ ދެ ސަރަހައްދަކުން ނުޤަވާއިދުން އުޅޭ ބިދޭސީންތަކެއް ހައްޔަރުކޮށްފިއެވެ.
ބިދޭސީންގެ މައްސަލަ ހައްލުކުރުމަށް އިމިގްރޭޝަނުން ހިންގަމުން އަންނަ އޮޕަރޭޝަންގެ ތެރެއިން ގ. ހީނާމާގެ ޕާކިން ސަރަހައްދުން ބަލައި ފާސްކުރި ބިދޭސީންގެ ތެރެއިން، ރާއްޖޭގައި މަސައްކަތް ކުރުމުގެ ހުއްދަ ނެތް 14 ބިދޭސީއަކު އިމިގްރޭޝަން ބެލުމުގެ ދަށަށް ގެނެސްފައިވާ ކަމަށް އެ އިދާރާއިން ބުނެއެވެ.
މީގެ އިތުރުން މާފަންނު ސަރަހައްދުގައި ބިދޭސީން ދިރިއުޅެމުންދާ އެކަމޮޑޭޝަން ބްލޮކެއްގައި ނުޤަވާއިދުން އުޅޭ ބިދޭސީންތަކެއް އުޅެމުން އަންނަކަމަށް ސިޓީ ކައުންސިލުން ހިއްސާކުރި މައުލޫމާތާއި ގުޅިގެން އެ ތަން ބަލައި ފާސްކޮށް 8 ބިދޭސީއަކު އިމިގްރޭޝަންގެ ބެލުމުގެ ދަށަށް ގެނެސްފައިވާކަމަށް އެ އިދާރާއިން ވަނީ ބުނެފައެވެ.
ގަވާއިދާ ޚިލާފަށް މަސައްކަތްކުރަމުން އަންނަ ބިދޭސީން އަތުލައިގަންނަން އިމިގްރޭޝަނުން ކުރިއަށް ގެންދާ ޚާއްސަ އޮޕަރޭޝަންގެ ތެރެއިން މިހާތަނަށް 2،000 އަށްވުރެ ގިނަ ބިދޭސީން ވަނީ ޑީޕޯޓުކޮށްލައިފައެވެ.
އަދި، ގިނަ އަދަދެއްގެ މީހުން މިހާރު ވެސް އިމިގްރޭޝަންސްގެ ބެލުމުގެ ދަށުގައި އެބަތިއްބެވެ