ދިވެހިން އުފެއްދުންތެރިކަން އިތުރުކޮށް ވިޔަފާރި ފުޅާކުރުރުމަށާއި ދިވެހިން އުފެއްދުންތެރިންގެ އުފެއްދުންތަކަށް މާކެޓް ހޯދައިދީ އެތަކެއްޗަށް މަގުބުލުކަން ހޯދައިދިނުމުގެ ގޮތުން ބާއްވާ ދިވެހި އުފެއްދުންތެރިކަމުގެ މައުރަޒު އަންނަ އަހަތުގެ މެއި މަހުގައި ބޭއްވުމަށް ނިންމައިފިއެވެ.
މިކަން ހާމަކޮށް އިގުތިސާދީ ތަރައްގީއާއި ވިޔަފާރިއާ ބެހޭ ވުޒާރާއިން އަންނަ އަހަރުގެ މެއި މަހުގެ 23 ން 31 ގެ ނިޔަލަށް ހުޅުމާލޭގައި ބާއްވާ މި މައުރަތުގައި 81 ގިންތިއަކުން އުފެއްދުންތައް ބައިވެރިކުރެވޭނެ ކަމަށާއި މި މައުރަޒުގައި ބައިވެރިވުމުގެ ފުރުސަތު، އަމިއްލަ ފަރުންނާއި، ކުންފުނިތަކާއި ވިޔަފާރިތަކާއި، ރަށްތަކާއި ސިޓީތަކުގެ އިތުރުން ތައުލީމު ދޭ މަރުކަޒުތަކާއި ހާއްސަ އެހީއަށް ބޭނުންވާ ފަރާތްތަކަށް އެ ފުރުސަތު ހުޅުވާލެވިފައިވާކަމަށެވެ.
މި މައުރަޒުގައި ބައިވެރިވުމުގައި ޢަމަލުކުރާނެ އުސޫލާއި ބައިވެރިވުމަށް އަމަލު ކުރަން ޖެހޭ ގޮތް ވަރަށް އަވަހަށް އިއުލާނުކުރުމަށް ވަނީ ހަމަޖެހިފައެވެ.
މި މައުރަޒުގައި ކްރިއޭޓިވް އިކޮނޮމީ ޑިސްޓްރިކްޓަކާއި، ޑިޖިޓަލް އެންޑް އިނޮވޭޓިވް ޑިސްޓްރިކްޓަކާއި، އެންޓެޓެއިންމަންޓް ޑިސްޓްރިކްޓަކާއި އަދި މާކެޓްޕްލޭސް ޑިސްޓްރިކްޓެއް މައުރަޒު ތެރޭގައި ހިމެނިގެންދާނެއެވެ. އަދި އާ އީޖާދުތައް އުފެއްދުމަށް ހިތްވަރު ދިނުމުގެ ގޮތުން، އެފަދަ އީޖާދުތައް ކުރާ ފަރާތްތަކަށް ކަނޑައެޅޭ އުސޫލެއްގެ ތެރެއިން، ރިސާޗް ގްރާންޓް ފަންޑުން އެހީތެރިކަން ދޭނެއެވެ.
މީގެއިތުރުން ބައިނަލްއަގުވާމީ ބައިވެރިންނަށް މައުރަޒުގައި ބައިވެރިވުމުގެ ފުރުސަތު ދިނުމަށްވެސް ވަނީ ނިންމައިފައެވެ.