އިމްޕޯޓް ޑިއުޓީ މަޢާފުކުރުމުގައި ޢަމަލުކުރާ އުސޫލަށް އިސްލާޙު ގެނެސްފިއެވެ.
މި އިސްލާޙަކީ ސަލާމަތާއި ރައްކާތެރިކަން ކަށަވަރުކުރުމުގެ ކަންކަން ބެލެހެއްޓުމަށްޓަކައި ގެނެވުނު އިސްލާހެކެވެ. އެގޮތުން ސަލާމަތީ ޚިދުމަތްތައް ފޯރުކޮށްދިނުމަށް ބޭނުންކުރާ ތަކެތި ރާއްޖެ އެތެރެ ކުރުމުގައި ނެގޭ އިމްޕޯޓް ޑިއުޓީ މަޢާފުކުރުމަށް ދިވެހިރާއްޖޭގެ އެކްސްޕޯޓް އިމްޕޯޓު ޤާނޫނުގެ ދަށުން މިހާރު ވަނީ ނިންމާފައެވެ. އެހެންކަމުން ސަލާމަތީ ޚިދުމަތްތައް ފޯރުކޮށްދިނުމަށް ރާއްޖެ އެތެރެކުރާ ތަކެތި “ޚާއްޞަ ހާލަތްތަކުގައި ގެނެވޭ ތަކެތީގެ ޑިއުޓީ މަޢާފްކުރުމުގެ އުސޫލު”ގެ ދަށުން މިހާރު ޑިއުޓީއާ ނުލާ އެތެރެ ކުރެވޭނެއެވެ.
މި އިސްލާޙު މިހާރު ވަނީ ގެޒެޓުގައި ޝާއިޢު ވެސް ކޮށްފައެވެ. ގެޒެޓުގައި މި އުސޫލު ޝާއިޢު ކުރާ ތާރީޚުން ފެށިގެން މި އުސޫލަށް އަމަލުކުރަން ފަށާނެކަމަށް ރައީސުލްޖުމްހުރިއްޔާގެ އޮފީހުން ހާމަކޮށްފައިވެއެވެ.
މީގެ ކުރިން ޑިއުޓީ މަޢާފުކޮށްދީފައިވާނީ ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިންނާއި ދިފާޢީ ވުޒާރާއިން އެ ކަމަށް އެދި ސިޓީއެއް ފޮނުވުމުންކަމަށް ކަސްޓަމްސްއިން ބުނެފައިވެއެވެ.
