ކޮފްސީ ސިރަޕް ރާއްޖެ އެތެރެކޮށް، ވިއްކުން ސަރުކާރުން މަނާކޮށްފިއެވެ.
މޯލްޑިވްސް ފުޑް އެންޑް ޑްރަގު އޮތޯރިޓީ (އެމްއެފްޑީއޭ)އިން އިއްޔެ ނެރުނު އެލާޓެއްގައި ބުނެފައިވާ ގޮތުގައި މި ބޭހުން ކުނޑިތަކެއް ފެނިފައިވާކަން މިހާރު ވަނީ ފާހަގަ ކުރެވިފައެވެ. އެހެންކަމުން އިއްޔެއިން ފެށިގެން މި ބޭސް ވިއްކުން މަނާކޮށްފައިވާކަމަށް އެ އެލާޓުގައި ބުނެފައިވެއެވެ.
ބޭހުގެ ފޮޓޯ ހިއްސާކޮށް އެމްއެފްޑީއޭއިން ބުނީ ކޮފްސީ ސިރަޕްގެ 100 މިލިލީޓަރުގައި ކުނޑިކޮޅުތަކެއް ހުންނަކަން ފާހަގަކުރެވިފައިވާކަމަށެވެ.
އެ މައްސަލަ އިތުރަށް ބެލުމުގެ މަސައްކަތް އެމްއެފްޑީއޭއިން މިހާރު ކުރަމުން އަންނަކަމަށް ވެސް އެ އޮތޯރިޓީން ބުނެފައިވެއެވެ. އަދި އެ އޮތޯރިޓީން ވަކި ގޮތެއް އަންގަންދެން އެ ބޭސް ރާއްޖެ އެތެރެކުރުން ވެސް މަނާ ކުރެވިފައިވާކަމަށް ބުނެފައިވެއެވެ.
ރާއްޖޭގައި އާންމުކޮށް ބޭނުންކުރަމުން އަންނަ އެ ބޭހަކީ އިންޑިއާގެ ޗެންނާއީގެ އުފެއްދުމެކެވެ.
