ދިރާސާގެ އަލީގައި މަސައްކަތްތައް ބައްޓަންކުރެވިއްޖެނަމަ، އިޤްތިޞާދީގޮތުން ފުދުންތެރި ޤައުމަކަށް ދިއުމަށް ރާއްޖެއިން ކުރާ މަސައްކަތަށް ބޮޑެތި ޙައްލުތަކެއް ހޯދޭނެކަމަށާއި، ރިސާޗް އެންޑް ޑެވެލޮޕްމަންޓް ދާއިރާއަށް ސަރުކާރުން ކުރާ އިންވެސްޓްމަންޓް އިތުރުކުރައްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ މޯލްޑިވްސް ނެޝަނަލް ޔުނިވާސިޓީ (އެމްއެންޔޫ)ގައި އިއްޔެ ބޭއްވި އަހަރީ ތެވެލި ކޮންފަރެންސް ހުޅުވުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ. ތެވެލި ކޮންފަރެންސަކީ ދިރާސާތަކަށް ޚާއްސަކޮށްގެން ރާއްޖޭގައި ކުރިއަށްގެންދާ ބައިނަލްއަޤްވާމީ އެންމެ ބޮޑު ކޮންފަރެންސެވެ. ކުރިއަށް އޮތް ތިން ދުވަހަށް ދެމިގެންދާ މި މަހާސިންތާގެ މި އަހަރުގެ ތީމަކީ “ބްރިޖިން ބައުންޑަރީސް: އެކްސްޕްލޯރިން ސިނާޖީސް އެކްރޮސް ރިސާޗް ޑިސިޕްލިންސް”އެވެ.
މި ކޮންފަރެންސްގައި ރައީސް ވިދާޅުވީ ދިރާސާއަކީ ރާއްޖެ ފަދަ ކުޑަ ގައުމެއް ތަރައްޤީކުރުމުގައި މުހިއްމު ދައުރެއް އަދާކުރާ އެއްޗެއްކަމަށާއި ކުރިއަށް އޮތް ތަނުގައި ދިރާސާގެ އަލީގައި ބިނާވާ މުސްތަގުބަލެއް ތަރައްޤީކުރުމަށްޓަކައި އެ ދާއިރާއަށް ކުރާ އިންވެސްޓްމަންޓް އިތުރުކުރައްވާނެކަމަށެވެ.
އެ މަނިކުފާނު އިތުރަށް ވިދާޅުވީ ދިރާސާއަކީ ހަމައެކަނި ތަޢުލީމާއި ސިޔާސަތުތައް ހެދުމުގެ ބޭނުމަށް ކުރެވޭ މަސައްކަތެއް ނޫންކަމަށެވެ. މިއީ ޤައުމަށް ފައިދާ ހުރި ސިނާޢަތްތައް ކުރިއަރުވާ، ކުރިމަގުގައި ފުދުންތެރި މުޖުތަމަޢެއް ބިނާކުރުމަށް ވެސް ކުރެވޭނެ އެންމެ މުހިންމު މަސައްކަތްކަން ރައީސް ފާހަގަކުރެއްވިއެވެ.
ރައީސް ވަނީ ދިރާސާވެރިންނަށް ޚާއްޞަ ގައުމީ ރިސާޗް ކައުންސިލެއް ގާއިމުކުރުމަށް ކުރާ މަސައްކަތަށް ވެސް އަލިއަޅުއްވާލައްވާފައެވެ. ރައީސް ވިދާޅުވީ ތަޢުލީމީ އިދާރާތައް އިތުރަށް ހަރުދަނާކުރުމަށާއި ޤައުމީ ތަރައްޤީއާ ބެހޭ މަޝްރޫޢުތަކުގައި މަސައްކަތް ކުރުމުގެ ފުރުސަތު ވެސް ދިރާސާވެރިންނަށް ފަހިކޮށްދެއްވާނެކަމަށެވެ. އަދި ދިރާސާކުރުމުގެ މަސައްކަތުގައި ސަރުކާރާއި ޕްރައިވެޓް ސެކްޓަރ އަދި ތަޢުލީމީ މަރުކަޒުތައް ގުޅިގެން މަސައްކަތް ކުރެވިއްޖެނަމަ، މުޖުތަމަޢުގައި ހުރި ބޮޑެތި މައްސަލަތަކަށް ޙައްލު ހޯދޭނެކަމަށް ވެސް ރައީސް ވިދާޅުވިއެވެ.
“ރާއްޖޭގެ އިޤްތިޞާދު ފުޅާކުރުމަށް ކުރިމަގަށް ގިނަ މުހިންމު ކަންތައްތަކެއް ސަރުކާރުން ވަނީ ރާވާފައި. ދަނޑުވެރިކަން، މަސްވެރިކަމުގެ ސިނާޢަތް، ތިމާވެށީގެ އިޖާދުތައް، އާއްމު ސިއްޙަތާ ގުޅޭ ކަންކަން، ފަތުވެރިކަން ފަދަ ދާއިރާތަކުން ގިނަ އިންވެސްޓްމަންޓްތަކެއް އަންނާނެ. މިކަމަށް ދިރާސާ ބޭނުންވޭ. ދިރާސާތަކަށް ބޭނުންވާ އެހީތެރިކަންވެސް ދޭން ސަރުކާރުން ނިންމާފައިވަނީ، މިފަދަ މުހިންމު ކަންކަން ހާސިލްކުރުމަށް.” ރައީސް ވިދާޅުވިއެވެ.
ދިރާސާކުރުމާއި އިޖާދީ ވިސްނުންތަކަށް އިސްކަންދެއްވުމުގެ ގޮތުން ދިރާސާއަށް ޚާއްޞަ ގްރާންޓެއް ދެއްވުމަށް ރައީސް ވަނީ ނިންމަވާފައެވެ.
