އިލެކްޓްރޯނިކް މަނީ އިޝޫކުރުމުގެ ހިދުމަތް ދިނުމަށް ބޭނުންވާ ޕޭމަންޓް ހިދުމަތް ދިނުމުގެ ލައިސަންސް ދިރާގު ފިންޓެކް ޕްރައިވެޓް ލިމިޓެޑަށް ދޫކޮށްފިއެވެ.
މޯލްޑިވްސް މަނިޓަރީ އޮތޯރިޓީ އިން ބުނެފައިވާ ގޮތުގައި މިހިދުމަތް ދިނުމުގެ ލައިސެންސް ދިރާގަށް ދޫކުރުމުން، ދިރާގުން މިހާރު ދެމުންދާ އިލެކްޓްރޯނިކް މަނީ އިޝޫކުރުމުގެ ހިދުމަތް ދިރާގު ފިންޓެކް ޕްރައިވެޓް ލިމިޓެޑްގެ ދަށަށް ބަދަލު ކުރެވިފައިވާ ކަމަށެވެ.
މޯލްޑިވްސް މަނިޓަރީ އޮތޯރިޓީ އިން ވަނީ ނެޝަނަލް ޕޭމަންޓް ސިސްޓަމްގެ ގާނޫނު (8/2021) ގެ ދަށުން ދިރާގުގެ މައްޗަށް އެކުންފުނީގެ މޮބައިލް މަނީ ސާވިސް (ދިރާގު ޕޭ) ކުރިއަށް ގެންދިއުމަށް ހާއްސަ ކުންފުންޏެއް އުފެއްދުމަށް ލައިސަންސް ޝަރުތެއް ލާޒިމްކޮށްފައެވެ. އެހެންކަމުން ދިރާގުން ވަނީ ކުންފުނިތަކުގެ ގާނޫނުގެ 10/96 ގެ ދަށުން، ހުސްވި އަހަރުގެ ޑިސެމބަރު މަހުގެ 31 ވަނަ ދުވަހު ދިރާގު ފިންޓެކް ޕްރައިވެޓް ލިމިޓެޑްގެ ނަމުގައި ސަބްސިޑަރީ ކުންފުންޏެއް ރަޖިސްޓްރީ ކޮށްފައެވެ.
ދިރާގުން ބުނެފައިވާ ގޮތުގައި މި ބަދަލާއެކު އެ ކުންފުނީގެ މޮބައިލް މަނީގެ ހިދުމަތާއި ރޭވިފައި ހުރި އެހެނިހެން މާލީ ހިދްމަތްތަކުގެ ސަބަބުން ވިޔަފާރިއަށް ތަނަވަސްކަން ލިބި ކަސްޓަމަރުންނަށް އިތުރު ހިދުމަތްތަކެއް ލިބިގެންދާނެ އެވެ.
