އާންމު ސިއްހަތުގެ ޤާނޫނާއި ޚިލާފުވި ކާބޯތަކެތި ވިއްކާ 1579 ތަނެއް ފާއިތުވި އަށް މަސްދުވަހުގެ ތެރޭގައި ބަލައި ފާސްކޮށްފިއެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން މިނިސްޓަރ ވިދާޅުވީ، މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން މިހާރު އަމަލުކުރަމުން އަންނަ އާންމު ސިއްހަތުގެ ޤާނޫނުގެ ދަށުން ބަލައި ފާސްކުރެވިފައިވަނީ ހަމައެކަނި ރެޖިސްޓަރ ކުރެވިފައިވާ ތަންތަން ކަމަށެވެ.
އެގޮތުން މިއަދުގެ ޖެނުއަރީން ފެށިގެން އޯގަސްޓް މަހާއި ދެމެދު ކާބޯތަކެތީގެ ޚިދުމަތްދޭ 1579 ތަނެއް ބަލައި ފާސްކޮށް އެތަންތަނުގެ ތެރެއިން 14 ތަނެއް ބަންދު ކުރެވުނު ކަމަށާއި އެހެން ނަމަވެސް މައްސަލަތައް ހައްލުކޮށް އޭގެ ތެރެއިން 13 ތަނެއް އަލުން ހުޅުވުމުގެ ހުއްދަ ދީފައިވާކަމަށެވެ.
މީގެ އިތުރުން ނުތާހިރުވުމާއި ކުޑަކުޑަ ގޮޅި ގޮޅީގައި ސިއްރުން ކެއްކުން ފަދަ ކަންކަން އާންމު ގޮތެއްގައި ކުރަނީ ގަވާއިދާ ހިލާފަށް ރާއްޖޭގައި އުޅޭ ބިދޭސީންކަމަށާއި އެތަންތަން ރަޖިސްޓްރީ ނުކޮށް ހިންގާތީ، އެތަންތަން ބަންދު ކުރުމުގެ ބާރު އެމްއެފްޑީއޭއަށް ނޯންނަ ކަމަށްވެސް ވަޒީރު ވަނީ ވިދާޅުވެފައެވެ.
ހަމައެޔާއެކު ކަންމަތީ ފިހާރަތަކުގައި ވިއްކަން ހުންނަ ތައްޔާރީ ލުއިކާނާތަކުގެ ތެރޭގައި ހިމެނޭ ގުޅަ، ކޭކު ފަދަ ތަކެތި އެއީ ކޮންތަނަކުން އުފައްދާ ތަކެތިކަން ނޭނުގުމުގެ ސަބަބުން އޭގަ ގޯހެއް ހުއްޓަސް ޒިންމާ ކުރުވާނެ ފަރާތެއް ނޯންނަކަމުގައި މިނިސްޓަރ ވިދާޅުވިއެވެ.
މިނިސްޓަރު ވިދާޅުވީ އަލަށް އަމަލުކުރަން ފަށާ ކާބޯތަކެތީގެ ރައްކާތެރިކަމުގެ ގާނޫނަށް އަމަލު ކުރަން ފެށުމުން ވަރަށް ގިނަ ބާރުތައް އެމްއެފްޑީއޭ އަށް ލިބިގެންދާނެ ކަމަށެވެ. އަދި އެގޮތަށް ކާކުކަން ނޭންގޭ ކާބޯތަކެތި މާކެޓަށް ނެރުން މަނާ ވެގެން ދާނެ ކަމަށާއި، އެފަދަ ތަންތަން ބަންދު ކުރުމުގެ ބާރު ވެސް އެމްއެފްޑީއޭ އަށް ލިބިގެންދާނެ ކަމަށެވެ.
އެ ގާނޫނުގައި، ކާބޯތަކެތި އުފައްދާ އަދި ވިއްކާ ތަންތަނުގެ ސާފުތާހިރުކަން ހުންނަންވާ މިންގަންޑުތައް ބަޔާންކޮށްފައި ހުންނާނެ ކަމަށާއި، ގާނޫނާ ހިލާފުވާ ތަންތަން އެއް މިލިއަން ރުފިޔާއާ ހަމައަށް ޖޫރިމަނާ ކުރުމުގެ ބާރު ލިބިގެންދާނެ ކަން ވެސް މިނިސްޓަރު ފާހަގަކުރެއްވިއެވެ.
އާ ގާނޫނަށް އަމަލުކުރަން ފަށަން ތައްޔާރުވެފައިވާއިރު، ފުލުހުންނާއި އިމިގްރޭޝަން ގުޅިގެން ގަވާއިދާ ހިލާފަށް އުޅޭ ބިދޭސީން ހޯދުމުގެ މަސައްކަތުގެ ތެރެއިން، ގަވާއިދާ ހިލާފަށް ކާބޯތަކެތި ހަދާ ތަންތަނާއި ނުތާހިރު ތަންތަން ބަންދު ކުރުމުގެ މަސައްކަތް ދަނީ ކުރަމުންނެވެ. އެތަންތަން ހިންގާ މިހުން އިމިގްރޭޝަންގެ ބެލުމުގެ ދަށަށް ދަނީ ގެންދަމުންނެވެ. އާ ގާނޫނުގެ ދަށުން އެފަދަ މީހުން ޑީޕޯޓް ކޮށްލުމުގެ ބާރު ހެލްތު މިނިސްޓްރީއަށް ވެސް ލިބިގެންދާނެއެވެ.