ކިނބިގަސްމަގު، ހެންވޭރު ސަހަރާ ކައިރީގައި ގައުތައް އެކިވަރަށް ހުރުމުގެ ސަބަބުން ދުއްވާ ފަރާތްތަކަށް ދިމާވަ ދަތިތައް ހައްލުކުރުމަށް މާލޭ ސިޓީ ކައުންސިލުން އިސްނަގައިގެން އެ މަގުގެ އަޑިގުނޑަން ވެފައިވާ ސަރަހައްދު ރޫޅާ، ބިން ލެވެލްކޮށް، ގައު އަތުރައިފިއެވެ.
މާލޭ ސިޓީ ކައުންސިލުން މި މަސައްކަތް ނިންމާފައިވަނީ އިއްޔެއެވެ. އެ ކައުންސިލުން ބުނެފައިވާ ގޮތުގައި މާލޭގެ މަގުމަތުގައި އަޑިގުޑަން ހެދިފައި ހުންނަން ޖެހުމުގެ މައިގަޑު ސަބަބަކީ ކޭބަލް ވަޅުލާ ފަރާތްތަކުން ކޭބަލް ވަޅުލުމަށްފަހު، މަގު އެއްވަރުނުކުރުމާއި ގައު އެތުރުމުގައި ފަރުވާ ކުޑަކުރުމެވެ.
މި ފަދަ މައްސަލަތަކާ ގުޅިގެން މަގުތައް ކޮނުމުގެ މަސައްކަތްކުރާ ފަރާތްތަކުގެ ސަމާލުކަމަށް ސިޓީ ކައުންސިލުން މިހާރު ވަނީ މި މައްސަލަ ގެނެސްފައެވެ. އަދި އެ ފަރާތްތަކުން މަސައްކަތް ނިންމުމަށް ފަހު މަގުތައް އެއްވަރު ކުރުމަށް މާލެ ސިޓީގެ މޭޔަރު އާދަމް އާޒިމް ވަނީ އިލްތިމާސްކުރައްވައިފިއެވެ.
އެގޮތުން ފަރުވާ ކުޑަކޮށް މަސައްކަތްކޮށްފައިވާ ސައިޓަކަށް ޒިޔާރަތްކުރައްވާ މޭޔަރު އާޒިމްގެ އިތުރުން އެމްޑަބްލިޔުއެސްސީގެ މެނޭޖިން ޑިރެކްޓަރު އަބްދުލް މަތީނާއި އެމްޑަބްލިއެސްސީގެ މުވައްޒަފުން ހިމެނޭހެން އެ ފަދަ ފަރާތްތަކާ އިއްޔެ ބައްދަލުކޮށްފައިވާކަމަށް ކައުންސިލުން ހާމަކޮށްފައިވެއެވެ.
