އިސްލާމީ ކަންތައްތަކާބެހޭ ވުޒާރާއިން އިންތިޒާމުކޮށްގެން ބާއްވާ ދީނީ ޢިލްމުވެރިންގެ އަހަރީ ބައްދަލުވުން އިސްލާމީ މަރުކަޒުގެ ޖަލްސާ ކުރާ މާލަމުގައި ރޭ ފަށައިފިއެވެ.
ޢިލްމުވެރިންގެ މި ބައްދަލުވުމުގެ މަޤްޞަދަކީ އެކި ދަންފަޅިތަކުގައި ދީނީ އެކި މުހިއްމު މަޢުޟޫއުތަކަށް ބަޙުޘްކުރުމާއި ތަފާތު މަޢުޟޫއުތަކަށް ޢިލްމުވެރިންނަށް މަޢުލޫމާތު ދިނުމުގެ ސެޝަންތައް ބޭއްވުމެވެ.
މި ރަސްމިއްޔާތު ޝަރަފުވެރިކޮށްދެއްވާފައި ވަނީ ދުކްތޫރު ޙަމްދާން ބިން ޙުމައިދު ބިން ބުރައިކް އައްސުލަމީއެވެ. އެ ބޭފުޅާއަކީ ޖަމްޢިއްޔަތު ތުފޫދުލް ޙަރަމްގެ ރައީސްކަމުގެ މަޤާމު މި ވަގުތު ފުރުއްވަމުން ގެންދަވާ ބޭފުޅާއެވެ.
ޙަމްދާންގެ އިތުރުން އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވެސް ވަނީ މި ރަސްމިއްޔާތުގައި ވާހަފުޅުދައްވާފައެވެ. ޝަހީމް ވިދާޅުވީ މި މަހާސިންތާގެ މަޤްޞަދަކީ ޢިލްމުވެރިންނާއެކު މަޝްވަރާކޮށް، ކަންކަމަށް ހައްލު ހޯދުމަށް މަސައްކަތްކުރުންކަމަށެވެ. އެގޮތުން ރާއްޖޭގެ ދީނީ ހާލަތާ ގުޅޭގޮތުން މަޝްވަރާކޮށް، ބަދަލު ގެންނަން ޖެހޭ ކަންކަން ތަންފީޒުކުރުމުގައި އިލްމުވެރިންގެ ރަޢުޔު ގައުމަށް ބޭނުންވާކަމަށް ޝަހީމް ވިދާޅުވިއެވެ. މި ގޮތަށް މަސައްކަތް ކުރެވިއްޖެ ނަމަ އިސްލާމީ ތަސައްވުރެއް އެކުލަވާލުމަށް މި މަހާތިންސާގެ ސަބަބުން އެހީތެރިވެދޭނެކަމަށް ޝަހީމު ވިދާޅުވިއެވެ.
މީގެ އިތުރުން އިޖްތިމާއީ އަދި އިޤްތިޞާދީ ކަންތައްތަކާ ގުޅޭގޮތުން ވެސް މި މަހާސިންތާގެ ސެޝަންތަކުގައި މަޝްވަރާކުރުމަށް ހަމަޖެހިފައިވާކަމަށް މައުލޫމާތު ލިބެއެވެ.
ޝަހީމް ވަނީ އިސްލާމީ ކަންތައްތަކާބެހޭ ވުޒާރާއިން ކުރިއަށް ގެންދާ ކަންކަމުގައި ޢިލްމުވެރިންގެ ފަރާތުން ލިބޭ އެއްބާރުލުމަށް ޝުކުރު އަދާކުރައްވާފައެވެ. އަދި އެ ކަންކަމުގައި އެންމެ މުހިންމު ދައުރެއް އަދާކުރައްވާ ބަޔަކީ ދީނީ ޢިލްމުވެރިންކަމަށް ޝަހީމް ވަނީ ވިދާޅުވެފައެވެ.
މި ބައްދަލުވުންތައް ކުރިއަށް ގެންދިއުމަށް ހަމަޖެހިފައިވަނީ މިރޭގެ ނިޔަލަށެވެ.
