ތައިލޭންޑްގެ ވެރިރަށް ބެންކޮކް ކައިރިން 9 މީހުންނާ އެކު ދަތުރުކުރި މަތިންދާބޯޓެއް ވެއްޓި، އެންމެން މަރުވެއްޖެއެވެ.
ސެސްނާ ކެރަވަން ސީ 208 ބީ ނަމަކަށް ކިޔާ މި ބޯޓު މިދިޔަ ބުރާސްފަތި ދުވަހު ބެންކޮކްގެ މައި އިންޓަނޭޝަނަލް ވައިގެ ބަނދަރު ސުވަރުނަބޫމީ އެއަރޕޯޓުން، ޓްރެޓް ޕްރޮވިންސްއަށް ދިއުމަށް ނައްޓާލީ އެ ގައުމުގެ ލޯކަލް ގަޑިން މެންދުރުފަހު 2:46 ގައެވެ.
ސީއެންއެންއިން ރިޕޯޓޫކޮށްފައިވާ ގޮތިގައި އެ ބޯޓުގައި ތިބީ ތައިލެންޑުގެ 2 ޕައިލެޓުންނާއި، ޗައިނާއަށް ނިސްބަތްވާ 5 ފަސިންޖަރުންގެ އިތުރުން ތައިލެންޑުގެ 2 ފަސިންޖަރުންނެވެ. މި އެންމެން ވެސް ބޯޓު ވެއްޓުމާއެކު ވަނީ މަރުވެފައިކަމަށް ނޫސްތަކުން ރިޕޯޓުކޮށްފައިވެއެވެ.
ތައިލެންޑްގެ ޕަބްލިކް ރިލޭޝަންސް ޑިޕާޓްމަންޓުގެ ޗަޗޮއެންސާއޯ ޕްރޮވިންޝަލް އޮފީހުން ހާމަކޮށްފައުވާ ގޮތުގައި ދަތުރު ފެށިތާ 10 މިނެޓު ފަހުން ބޯޓާ ގުޅުން ކެނޑިފައިވެއެވެ.
ޗަޗޮއެންސާއޯގެ ބޭންގް ޕަކޮންގް ޑިސްޓްރިކްޓްގެ ބައެއް ރައްޔިތުންނަށް އެ ބޯޓު ވެއްޓޭ މަންޒަރާއި ގޮވާ އަޑު ކައިރިން ފެނުނުކަމަށް ބައެއް ނޫސްތަކުން ހާމަކޮށްފައިވެއެވެ. އަދި އެ ސަރަހައްދުގެ ބައެއް ގެތަކަށް އެކިވަރުގެ ގެއްލުން ލިބިފައިވާކަމަށް ވެސް މައުލޫމާތު ލިބެއެވެ.
އެ ބޯޓު ވެއްޓުނު ސަރަހައްދުން މަތިންދާބޯޓުގެ ބައިތަކާއި، 70އާ ގާތްކުރާ އަދަދަކަށް މަރުވެފައިވާ މީހުންގެ ހަށިގަނޑުގެ ބައިތައް ފެނިފައިވާކަމަށް ޕްރޮވިންޝަލް އޮފީހުން ހާމަކޮށްފައިވެއެވެ. އަދި އިތުރު ތަޙުޤީޤަށް މި ބައިތައް ފުލުހުންގެ ހޮސްޕިޓަލަކަށް ފޮނުވިފައިވާކަމަށް ވެސް ޕްރޮވިންޝަލް އޮފީހުން ބުނެފައިވެއެވެ.
އެ މަތިންދާބޯޓު ވެއްޓިފައިވަނީ ކަނޑޫފާ ސަރަހައްދަކަށެވެ. އެ ތަނުގެ ބިން ވަނީ ކައިރީގައިވާ ކޯރަކުން އަރާފައިވާ ފެނުގެ ސަބަބުން ތެމިފައެވެ. އެހެންކަމުން މަރުވެފައިވާ މީހުންގެ ހަށިތައް ހޯދުމުގަޔާއި މަތިންދާބޯޓުގެ ބައިތައް ހޯދުމުގައި އެ ގައުމުގެ ފުލުހުންނަށް އިތުރު ދަތިތަކާ ކުރިމަތިލާން ޖެހި، އެ މަސައްކަތް ވަނީ އެތައް ގަޑިއިރަކަށް ދެމިގެންގޮސްފައެވެ.
ޕްރޮވިންޝަލް އޮފީހުން އާންމުކޮށްފައިވާ ފޮޓޯތަކާއި ވީޑިއޯތަކުން ފެންނަ ގޮތުގައި ގިނަ އަދަދެއްގެ ރެސްކިއު ޓީމުގެ މުވައްޒަފުންނާއި އިމަޖެންސީ މުވައްޒަފުން އެ ސަރަހައްދުގައި ހަރަކާތްތެރިވާ މަންޒަރު ފެނެއެވެ. އެ މީހުން ވަނީ އެ ސަރަހައްދުން ހަލާކުވެފައިވާ ސޫޓްކޭސްތަކާއި ހުޅުވިފައިވާ ދަބަސްތައް ހޯދާފައެވެ.
