ތ. ދިޔަމިގިލީ ކައުންސިލް އިދާރާގެ ތިޖޫރީން ހަ ލައްކަ ރުފިޔާ ގެއްލިއްޖެއެވެ.

މި މަހުގެ 19 ވަނަ ދުވަހު ނެރުނު ތ ދިޔަމިގިލީ ކައުންސިލްގެ 2022 ވަނަ އަހަރުގެ ކޮމްޕްލަޔަންސް އޮޑިޓް ރިޕޯޓުގައި ވާގޮތުން އެ ކައުންސިލްގެ ތިޖޫރީގައި ހުންނަން ޖެހޭ ފައިސާ އެ އަދަދަށް ނެތްކަން ވަނީ ފާހަގަ ކުރެވިފައެވެ.

އެގޮތުން 2022 ވަނަ އަހަރާއި ހަމައަށް ދިޔަމިގިލީ ކައުންސިލްގެ ތިޖޫރީގައި ހުންނަންޖެހޭ ފައިސާގެ ތެރެއިން ޖުމުލަ 605،438 ރުފިޔާ ގެއްލިފައިވާކަމަށް އޮޑިޓަރ ޖެނެރަލް، ހުސައިން ނިޔާޒު ނެރުއްވި އޮޑިޓް ރިޕޯޓްގައި ވަނީ ފާހަގަ ކުރައްވައިފައެވެ.

ރިޕޯޓުގައިވާ ގޮތުގައި 2020 ވަނަ އަހަރު ފެށުނުއިރު 2 މިލިއަނަށްވުރެ ގިނަ ރުފިޔާ، ނަގުދު ފައިސާގެ ގޮތުގައި ކައުންސިލްގައި ރޯލްކޮށްފައިވާއިރު އެއީ  އެ އަހަރު ފެށުނު އިރު އެ ކައުންސިލްގައި ހުރި، 468،004 ރުފިޔާ އާއި ކައުންސިލަށް ނަގުދު ފައިސާގެ ގޮތުގައި ބަލައިގެންފައިވާ 397،052 އާއި ބޭންކް އެކައުންޓްތަކުން ނަގާފައިވާ 1.9 މިލިއަން ރުފިޔާއެވެ.

އެގޮތުން އެ ރުފިޔާގެ ތެރެއިން 455،174 ރުފިޔާ ކައުންސިލްގެ އެކައުންޓަށް އަނބުރާ ޖަމާކޮށްފައިވާ ކަަމަށާއި އެކައުންސިލުން ހަރަދުކޮށްފައވަނީ 1.7 މިލިއަން ރުފިޔާ ކަމަށްބުނެފައި ވީނަމަވެސް އެ ކައުންސިލުން ޚަރަދުކޮށްފައި ވަނީ، އޭގެ ތެރެއިން 1.4 މިލިއަން ރުފިޔާކަން ކަށަވަރު ކުރެވިފައިވާ ކަމަށް ރިޕޯޓުގައި ވަނީ ބުނެފައެވެ. އެހެންކަމުން އެބައި އުނިކުރުމަށްފަހު އޮކްޓޯބަރު މަހާއި ހަމައަށް ތިޖޫރީގައި ހުންނަ ޖެހޭ 605،438 ނެތް ކަމަށް ރިޕޯޓުގައި ވަނީ ބުނެފައެވެ.

ވުމާއެކު އެރަށު ކައުންސިލްގެ ތިޖޫރީން އެއަދަދު ގެއްލިފައިވާތީ، އެ މައްސަލަ ތަހުގީގުކޮށް އެކަމުގައި ޝާމިލުވާ މީހުންނަށް ފިޔަވަޅު އެޅުމަށް ވެސް ވަނީ އަންގާފައެވެ.