އިމާމުން ތާޒާކުރުމުގެ ޕްރޮގްރާމް މިހާތަނަށް 157 އިމާމުން ފުރިހަމަކޮށްފައިވާ ކަމަށް އިސްލާމިކް މިނިސްޓްރީން ބުނެފި އެވެ.
އިމާމުން ތާޒާކުރުމުގެ ގައުމީ މަޝްރޫއުގެ ދަށުން ކުރިއަށްގެންދާ ޕްރޮގުރާމުގެ ތިންވަނަ ބުރު 40 އިމާމުން ފުރިހަމަކޮށް، ސެޓްފިކެޓު ހާސިލްކޮށްފައިވާ ކަމަށް އިސްލާމިކް މިނިސްޓްރީން ބުނެފައިވެއެވެ.
އިސްލާމިކް މިނިސްޓްރީން ވިދާޅުވީ މިޕްރޮގްރާމްގެ ސެޓްފިކެޓް ދިނުމުގެ ޖަލްސާ އޮތީ އޮންލައިންކޮށް މިނިސްޓްރީގައި ކަމަށެވެ. އަދި ވ އަދި މ އަތޮޅުގެ އިމާމުންނަށް ޚާއްސަކޮށްގެން މިފަހަރު ކުރިއަށް ގެންދިޔަ މި ޕްރޮގްރާމްގައި ހާތަނަށް 157 އިމާމުން މިޕްރޮގްރާމްގައި ބައިވެރިވެ ސެޓްފިކެޓު ހާސިލްކޮށްފައިވާ ކަމަށް މިނިސްޓްރީން ބުނެފައިވެ އެވެ.
އިސްލާމިކް މިނިސްޓްރީން ބުނެފައިވާ ގޮތުގައި އިމާމުން ތަމްރީންކުރުން ނުވަތަ ތާޒާކުރުމުގެ ގައުމީ މަޝްރޫއަކީ އިމާމުކަމުގެ ދާއިރާއިން އިތުރު ތަމްރީނު ދިނުމަށްޓަކައި 11 ސަރަހައްދަކަށް ބަހާލައިގެން ދާއިމީ އިމާމުންނަށް ޚާއްސަ ކޮށްގެން ކުރިއަށް ގެންދާ ޕްރޮގުރާމެކެވެ.
އެ ޕްރޮގުރާމު ކުރިއަށް ގެންގޮސްފައިވަނީ ތިން ދުވަހުގެ މުއްދަތަކަށް ކަމަށެވެ. އެ ޕްރޮގުރާމްގައި ޖުމްލަ ނުވަ މާއްދާ ކިޔަވާދީފައިވާ ކަމަށާއި ޤުރްއާނާއި، ތަޖުވީދުގެ ޢިލްމާއި، ތަފްސީރާއި، ފިޤުހާއި، ޙަދީޘާއި، އަޤީދާގެ ޢިލްމުގެ ދާއިރާއިން އިމާމަކަށް ބޭނުންވާ މުހިއްމު ޢިލްމު ހިމެނޭހެން ނުވަ މާއްދާ ކިވައިދީފައިވާ ކަމަށް ވެސް މިނިސްޓްރީން ބުނެފައިވެއެވެ.
މީގެއިތުރުން މިޕްރޮގްރާމްގައި މިސްކިތްތައް ބެލެހެއްޓުމުގެ ގޮތުން އަދާކުރަންޖެހޭ މަސްއޫލިއްޔަތު އަދާކުރެވޭނެ ވަރަށް އެ ޕްރޮގުރާމުގެ ތެރެއިން އިމާމުންގެ ޝަޚްޞިއްޔަތު ބިނާކުރެވޭނެ ކަމަށް ވެސް މިނިސްޓްރީން ބުނެއެވެ.
އިމާމުން ތަމްރީނުކުރުން ނުވަތަ ތާޒާކުރުމުގެ ގައުމީ މަޝްރޫއުގެ ތެރެއިން ސަރުކާރުގެ އަމާޒަކީ 2024 ވަނަ އަހަރު ޖުމްލަ 700 އިމާމުން ތަމްރީނުކޮށް ނިންމުން ކަމަށް އިސްލާމިކް މިނިސްޓްރީން ވަނީ ބުނެފައެވެ.
