އދ. ދިއްދޫ ކައުންސިލުން ފޯޖު ކޮށްފައިވާ ބޭންކު ސްޓޭޓްމަންޓެއް އޮޑިޓް އޮފީހަށް ހުށަހަޅާފައިވާ ކަން އެ ކައުންސިލުގެ 2022 ވަނަ އަހަރުގެ އޮޑިޓް ރިޕޯޓުން ދައްކައިފިއެވެ.

އޮޑިޓް އޮފީހުން އާންމުކުރި ރިޕޯޓްގައި ހާމަކޮށްފައިވާ ގޮތުގައި އދ. ދިއްދޫ ކައުންސިލްގެ އައިޓީ އެންޑް ފައިނޭންޝަލް ކޮންސަލްޓަންޓްގެ މަގާމުގައި ހުރި މުވައްޒަފަކު ވަނީ ކައުންސިލްގެ ބޭންކް ސްޓޭޓްމަންޓް ފޯޖުކޮށް، ބަދަލުކޮށް އޮޑިޓަރުންނަށް އޮޅުވާލަން މަސައްކަތް ކޮށްފައެވެ.

ރިޕޯޓުގައި އޮޑިޓް އޮފީހުން ބުނެފައިވާ ގޮތުގައި އޮގަސްޓް 3، 2022 ވަނަ ދުވަހު ކައުންސިލްގެ ތިޖޫރީގައި ފައިސާގެ ތެރެއިން 5،500 ރުފިޔާ އައިޓީ އެންޑް ފައިނޭންޝަލް ކޮންލަސްޓަންޓާ ހަވާލުކޮށްފައިވާއިރު، އެފައިސާ ކައުންސިލްގެ ބޭންކް އެކައުންޓަށް ޖަމާކޮށްފައި ނުވާކަން ބޭންކް ސްޓޭޓްމަންޓުން ހާމަވެއެވެ.

މިމައްސަލަ އާއި ގުޅިގެން ކައުންސިލްގެ މުވައްޒަފާއި ސުވާލުކުރުމުން މިދިޔަ އަހަރުގެ ޖުލައި 17 ގައި އަމިއްލަ ފަރާތަކުން ކައުންސިލްގެ ބޭންކް އެކައުންޓަށް ޖަމާކުރި 25،000 ރުފިޔާ ގެ ތެރޭގައި، އެ 5،500 ރުފިޔާ ހިމެނޭ ކަމަށް އޭނަ ބުނެފައިވެއެވެ. އަދި ދެން ޖަމާކުރި 19،500 ރުފިޔާ އަކީ ކުލީގެ ގޮތުގައި ކައުންސިލަށް ލިބުނު ފައިސާކަމަށް ވެސް އޭނާ ބުނެފައިވެ އެވެ. އޮޑިޓް އޮފީހުން ފާހަގަކޮށްފައިވާ ގޮތުގައި އެއޮފީހުން ބެލި ބެލުމުން މި 25000 ރުފިޔާ އަކީ ކައުންސިލަށް އެހީގެ ގޮތުގައި ލިބުން ފައިސާކަމަށް މިދިޔަ އަހަރުގެ ޖުލައި 19 ގައި ޖަމާކޮށްފައިވާ ސްޓޭޓްމެންޓަކުން ދައްކައެވެ.

މިމައްސަލަ އާއި ގުޅިގެން ފަހުން ވެސް އޭނާއާއި ސުވާލު ކުރުމުން އެ 5500 ރުފިޔާ އަކީ އޭނާގެ އަމިއްލަ އެކައުންޓަކަށް ޖަމާކުރެވިފައި ވަނީ އޮޅުމަކުން ކަމަށް އޭނާ ބުނެފައިވާ ކަމަށް އޮޑިޓް އޮފީހުން ބުނެފައިވެ އެވެ.

މިއަށްފަހު މިދިޔަ އަހަރުގެ ނޮވެމްބަރު މަހުގެ 13 ވަނަ ދުވަހު އޭނާ ވަނީ އޮޑިޓް އޮފީހަށް ބޭންކް ސްޓޭޓްމެންޓެއް ވެސް ހުށަހަޅާފައިވާ ކަމަށާއި މިސްޓޭޓްމެންޓްގައި ކައުންސިލުން ފުރަތަމަ ހުށަހެޅި ސްޓޭޓްމެންޓްގައި ނެތް 25000 ރުފިޔާ މިދިޔަ އަހަރުގެ ޖުލައި 19 ގައި ޖަމާވެފައި ހުރި ކަމަށް ދައްކުމުން، ބީއެމްއެލް މެދުވެރިކޮށް ބެލިބެލުމުން ކައުންސިލްގެ ބޭންކް ސްޓޭޓްމަންޓުގައި މި ފައިސާ ހިމެނިފައި ނުވާކަމަށް ވެސް އެއޮފީހުން ބުނެފައިވެ އެވެ.

އޮޑިޓް އޮފީހުން ވަނީ 2022 ވަނަ އަހަރުގެ މާލީ ހިސާބުތަކާއި އިދާރާގައި ހިނގި ކަންތައްތަކުގެ ރިޕޯޓު ހިމަނައިގެން އަހަރީ ރިޕޯޓެއް ދިއްދޫ ކައުންސިލްގެ އިދާރާއިން އޮޑިޓް އޮފީހަށް ހުށަހަޅާފައި ނުވާކަން ފާހަގަކޮށްފަ އެވެ. މިރިޕޯޓް ހުށަހަޅާފައި ނުވުމުގެ ސަބަބުން ޑިސެންބަރު 31، 2022 އަށް ނިމުނު މާލީ އަހަރުގެ މާލީ ބަޔާންތަކުގެ އޮޑިޓް ކުރެވިފައި ނުވާ ކަމަށާއި 2022 ވަނަ އަހަރު މުދަލާއި ހިދުމަތް ހޯދުމުގައި ދައުލަތުގެ މާލިއްޔަތުގެ ގަވައިދާ އެއްގޮތަށް އެކައުންސިލުން އަމަލުކޮށްފައި ނުވާކަމަށް ވެސް އޮޑިޓް އޮފީހުން ވަނީ ބުނެފައެވެ.