ޑްރަގު ކޯޓުގެ ޝަރީއަތުގެ މަޖިލީހުގެ ކުޑަދޮރެއް ހަލާކުކޮށްލުމަށް ފަހު، އެ ތަނަށް ވަދެ ވައްކަން ކުރި މީހާގެ ބަންދަށް އިތުރު 15 ދުވަސް ކްރިމިނަލް ކޯޓުން ޖަހައިފިއެވެ.
ކްރިމިނަލް ކޯޓުން އިއްޔެ ނެރުނު އަމުރުގައި ބުނާ ގޮތުން މި މައްސަލައިގައި ހައްޔަރުކުރި 32 އަހަރުގެ ދިވެހި ފިރިހެން މީހާ ވަނީ ޝަރީއަތުގެ މަޖިލީހުގައި ކުށަށް އިއުތިރާފުވެފައެވެ. އެ މީހާއަކީ ސަރުކާރުގެ އިމާރާތްތަކުން ވައްކަން ކުރުމުގެ ރެކޯޑެއް އޮތް މީހެކެވެ.
ވައްކަން ކުރިކަމަށް ތުހުމަތު ކުރެވޭ މި މީހާ ކޯޓު ތެރެއަށް ވަދެފައިވަނީ ކޯޓާ އިންވެގެން ހުންނަ ގެތަކާއި ކޯޓާ ދެމެދު އޮންނަ ގޯޅިއަށް ހުރި ކޯޓުގެ ޝަރީއަތް ކުރާ މާލަމެއްގެ ކުޑަދޮރު ހަލާކޮށްލައިގެންކަމަށް ޑްރަގު ކޯޓުން ވެސް ހާމަކުރެއެވެ. އެ މީހާ ވަނީ ކަބަޑެއް ފަޅާލައި، ކޯޓުގެ ރެކްރިއޭޝަން ކްލަބުގެ ބައެއް ފައިސާ ވަގަށް ނަގާފައިކަމަށް ޑްރަގު ކޯޓުން ބުނެއެވެ.
