ސިނަމާލޭ ބްރިޖްގެ ޓްރެފިކް ބެލެހެއްޓުމަށްޓަލައި ބްރިޖް ޕެޓްރޯލް ކުރުމަށް ސައިކަލުގައި ފުލުހުން ނިކުންނަން ނިންމައިފިއެވެ.
މިކަން ހާމަކޮށް ޕީއެސްއެމްގެ ރާއްޖެ މިއަދު ޕްރޮގްރާމްގައި ވާހަކަ ދައްކަވަމުން ޗީފް އިންސްޕެކްޓަރު މުހައްމަދު ލުތުފީ ވިދާޅުވީ މާލެ ސަރަހައްދުގެ އެންމެ ގިނަ އެކްސިޑެންޓްތައް ހިންގަނީ ސިނަމާލެ ބްރިޖްގައި ކަމަށެވެ.
އެގޮތުން ސިނަމާލެ ބެރިޖްގައި ހިނގާ އެކސިޑެންޓްތަކުން ލިބޭ ގެއްލުންތައް ބޮޑުކަމުގައި ފާހަގަކުރައްވައި ލުތުފީ ވިދާޅުވީ، އެފަދަ އެކްސިޑެންތައް މަދުކުރުމަށް ބްރިޖް ޕެޓްރޯލްކުުރުމުގެ މަސައްކަތް ހަރުދަނާ ކުރުމަށް މިހަފުތާ ނިމުމުގެ ކުރިން ބްރިޖް ޕެޓްރޯލް ކުރުމަށްޓަކައި ފުލުހުން ސައިކަލު ބޭނުން ކުރަން ފަށާނެކަމަށެވެ.
ބްރިޖުގައި ޕެޓްރޯލު ކުރުމަށް ސައިކަލު ބޭނުން ކުރަން ފެށުމުން އިތުރު ފަސޭހަތަކެއް ލިބޭނެ. ބްރިޖް އަރިމަތީގައި ޕާކުކޮށްގެން ފޯނުކުރުން ފަދަ ކަންކަމުގައި މަޑުކޮށްގެން ތިބޭ މީހުން ފޮނުވާލަން އޭރުން ފަސޭހަވާނެ – ލުތުފީ
މީގެ އިތުރުން މާލެ އާއި ހުޅުމާލޭގެ ފުލް ޕެޓްރޯލް ކުރާ ގޮތަށް ޕޮއިންޓް ހަދައިގެން ހުރިހާ ތާކު ތިބުމަކީ ފަސޭހަ ކަމެއް ނޫންކަމުގައި ވިދާޅުވެ، ލުތުފީ ވަނީ މިއަދާ ހަމައަށް ޕެޓްރޯލް ކުރަމުން އައީ ކާރު ބޭނުންކޮށްގެން ކަމަށް ވިދަޅުވެފައެވެ.
ލުތުފީ ވިދާޅުވީ ބްރިޖުގައި ބޮޑު އެކްސިޑެންޓެއް ހިނގައިފިނަމަ ޓްރެފިކަށް ވަރަށް ބޮޑަށް ބުރޫއަރާ ކަމަށާއި ސައިކަލު ބޭނުން ކުރަން ފެށުމުން އެފަދަ ސީންތަކަށް ވީހާވެސް އަވަހަށްދާން ފަސޭހަވެ އަވަހަށް ޓްރެފިކް ފްލޯ ހަމައަކަށް އެޅުމަށްވެސް ފަސޭހަވާނެ ކަމަށް ވެސް ވިދާޅުވިއެވެ.
އެގޮތުން ލުތުފީ ވިދާޅުވީ، ބްރިޖް ޕެޓްރޯލްކުރުމަށް ސައިކަލު ތައާރަފްކުރުމަކީ މިހާރަށް ވުރެ ބޮޑަށް ބުރިޖު މަތީގައި ފުލުހުންގެ ހަރަކާތްތައް އިތުރުވެ ކުށްކުރާ ފަރާތްތައް ދެނެގަތުމަށް އެޅޭ ރަނގަޅު ފިޔަވަޅަކަށް ވެގެންދާނެ ކަމަށެވެ.
