ހުސްވެފައިވާ ޕްރޮސެކިއުޓާ ޖެނެރަލްގެ މަޤާމަށް ރައީސް އޮފީހުގެ ލީގަލް ސެކްރެޓަރީ އައްބާސް ޝަރީފް އައްޔަންކުރަން މަޖިލިހުގެ ޖުޑިޝަރީ ކޮމިޓީން ފާސްކޮށްފިއެވެ.
ހުސްވި މަހުގެ 22 ގައި އެންމެފަހުން ޕީޖީގެ މަޤާމު އަދާކުރެއްވި ހުސައިން ޝަމީމް އެމަގާމުން އިސްތިއުފާ ދެއްވުމާއި ގުޅިގެން އެމަގާމަށް ކުރިމަތިލުމުގެ ފުރުސަތު ވަނީ ހުޅުވާލާފައެވެ. މިފުރުސަތުގައި ހަ މީހަކު އެމަގާމަށް ކުރިމަތިލައްވާފައިވާއިރު، ރައީސް އޮފީހުން ވަނީ އައްބާސްގެ ނަން އެމަގާމަށް ހުށަހަޅާފައެވެ.
މިއާއިއެކު މަޖިލީހުން ވަނީ މިއަދުގެ މެންދުރުފަހުގެ ނިޔަލަށް އައްބާސް އާއި ގުޅޭ ގޮތުން އެއްވެސް ޝަކުވާއެއް އޮތް ކަމުގައިވާ ނަމަ ހުށަހެޅުމަށް ހުޅުވާލާފައެވެ. އަދި މިމުއްދަތުގައި ޖުޑީޝަރީ ކޮމިޓީން އައްބާސްގެ ނަން ދިރާސާކޮށް ނިންމާފައިވާއިރު، އޭނާ އާއި އިންޓަވިއު ވެސް ވަނީ ކޮށްފައެވެ.
އައްބާސް އާއި އިންޓަވިއު ކުރުމަށްފަހު ޖުޑީޝަރީ ކޮމިޓީން ޕީޖީގެ މަޤާމަށް އައްބާސް އައްޔަން ކުރެއްވުމަށް ނިންމާފައި ވަނީ ކޮމިޓީގެ ބައްދަލުވުމުގައި ބައިވެރިވި ހުރިހާ މެންބަރުންގެ އިއްތިފާޤުންނެވެ. މީގެ ތެރޭގައި އެމްޑީޕީގެ މެންބަރުން ވެސް ހިމެނެއެވެ.
ޖުޑީޝަރީ ކޮމިޓީން ޕީޖީގެ މަޤާމަށް އައްބާސް އައްޔަން ކުރައްވަން ނިންމާފައިވާއިރު، ޕީޖީގެ މަޤާމަށް އައްބާސް އައްޔަން ކުރުމަށް މަޖިލީހުގެ ދައުރުން ބޭރުން ޚާއްސަ ޖަލްސާއެއް މާދަމާ ބޭއްވުމަށް ވަނީ ހަމަޖެހިފައެވެ.
ޤާނޫނީ ދާއިރާއިން އައްބާސް ތައުލީމް ހާސިލްކުރެއްވީ ޔުނިވާސިޓީ އޮފް ޓެސްމޭނިއާއިންނެވެ. އައްބާސް ވަނީ 2011 ވަނަ އަހަރުން ފެށިގެން 2015 ވަނަ އަހަރާ ހަމައަށް ހައިކޯޓުގެ ފަނޑިޔާރުކަން ވެސް ކުރައްވާފައެވެ.
