ކުރިއަށް އޮތް ތަނުގައި ސްޓޫޑެންޓް ލޯނުގެ ފައިސާ ދައްޗެއް ނެތި ހުރިހާ ދަރިވަރުންނަށްވެސް ލިބިގެންދާނެ ކަމުގެ ޔަގީންކަން ސަރުކާރުން އަރުވައިފިއެވެ.
ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި ސްޓޭޑެންޓް ލޯނު ލިބުން ލަސްވުމުގެ ކަންބޮޑުވުންތަކާއި ގުޅިގެން ކުރެވުނު ސުވާލަކަށް ޖަވާބު ދެއްވަމުން އެ އޮފީހުގެ ތަރުޖަމާނު ހީނާ ވަލީދު ވިދާޅުވީ، ސްޓޫޑަންޓް ލޯންގެ ކަންކަމަކީ ސަރުކާރުން ވަރަށް ބޮޑު އަހަންމިއްޔަތުކަމެއްދޭ އެއް މަސައްކަތް ކަމަށެވެ.
އެގޮތުން ދަރިވަރުންގެ ކިޔެވުމަށް ބުރޫނާރާނެ ގޮތަށް ފައިސާ ދެއްކޭނެ ގޮތް ހަމަޖެއްސުމަށް ސަރުކާރުން ބޮޑު އަހަންމިއްޔަތުކަމެއް ދޭކަން ފާހަގަކުރައްވައި ހީނާ ވިދާޅުވީ، ސްޓޫޑެންޓް ލޯނުގެ ފައިސާ ކުރިއަށް އޮތް ތަނުގައި ޤަވާއިދުން ދަރިވަރުންނަށް ލިބެމުންދާނެ ކަމަށެވެ.
މިއަހަރު ސްޓޫޑެން ލޯނަށް ހުޅުވާލި 500 ފުރުސަތަށް އެދި 1،709 ދަރިވަރަކު ކުރިމަތިލިއެވެ. އެގޮތުން ހަޔާ އެޑިއުކޭޝަން މިނިސްޓްރީން ނިންމާފައި އޮތީ ޝަރުތު ހަމަވާ ހުރިހާ ދަރިވަރުންނަށް ލޯނު ދޭށެވެ. އެއީ 1،015 ދަރިވަރުންނެވެ.
އެހެން ނަމަވެސް މި ދަރުވަރުންނަށް ލޯނަށް ލިބެންޖެހޭ ފައިސާ ދޫކުރުން ވަރަށް ބޮޑަށް ލަސްވެފައިވާތީ ބައެއް ދަރިވަރުން އަންނަނީ އެކަމުގެ ޝަކުވާ ކުރަމުންނެވެ.
އަލަށް ސްޓޫޑަންޓް ލޯނު ހަމަޖެހުނު ދަރިވަރުންނަށް ލޯނު ފައިސާ ދޫކުރުން ވަރަށް ބޮޑަށް ލަސްވެ އެކަމުގެ ޝަކުވާ ބޮޑުވެފައި ވާއިރު ފާއިތުވި ސަރުކާރުތަކުގައިވެސް މިފަދައިން ދޫކުރެވޭ ސްޓޫޑެންޓް ލޯންތަކަށްވާ ފައިސާ ނުލިބި އަދި ލަސްވުމުގެ ޝަކުވާތައް ލިބެއެވެ.
