ރާއްޖޭގެ ބާޒާރުގައި ފިޔާ ލިބުން ދަތުވެ އޭގެ އަފު އުފުލެމުން ދިއުމާގުޅިގެން ފިޔާގެ ދަތިކަން ހައްލުކުރުމުގެ ގޮތުން އަންނަ ހަފްތާގައި އެސްޓީއޯ މެދުވެރިކޮށް ފިޔާ ޝިޕްމަންޓެއް ގެނައުމަށް ނިންމާފައިވާކަމަށް ސަރުކާރުން ހާމަކޮށްފިއެވެ.
އިއްޔެ ކުރިއަށްދިޔަ ނޫސްވެރިންގެ ބައްދަލުވުމެއްގައި ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވީ، ފިޔާ ލިބުން ދަތުވެ ރާއްޖެއަށް އެތެރެކުރާ ފިޔާގެ ނިސްބަތް މަދުވެފައިވަނީ، އިންޑިއާއިން ފިޔާ އެކްސްޕޯޓުކުރާ މިންވަރު ދަށަށް ދިއުމުގެ ސަބަބުން ކަމުގައެވެ.
އެގޮތުން ބާޒާރުގައި ރައްޔިތުންނަށް ބޭނުންވާ އަސާސީ އެއްވެސް މުދަލެއް މަދުވާނަމަ އެކަން ހައްލުކުރުމަށް އަވަސް ފިޔަވަޅުތަކެއް އެޅުމަށް ސަރުކާރުން ޚާއްސަ ސަމާލުކަމެއް ދެމުން އަންނަކަމުގައި ހީނާ ވަނީ ވިދާޅުވެފައެވެ.
އެގޮތުން އިކޮނޮމިކް މިފަދަ ހާލަތެއް ކުރިމަތިވެއްޖެ ނަމަ، އެކަން ބެލުމަށް އިކޮނޮމިކް މިނިސްޓްރީ އާއި އެސްޓީއޯއާ އެކުގައި ވަކި ޓީކޮމެޓީއެއް އެކުލަވާލާފައިވާ ކަމަށާއި ކޮމިޓީގެ ފަރާތުން އެ މައްސަލަ ހައްލުކުރަން މަސައްކަތް ކުރާ ކަމަށް ހީނާ ވިދާޅުވިއެވެ.
ހަމައެޔާއެކު ހީނާ ވަނީ، ފިޔާގެ މައްސަލައަށް ހައްލެއް ހޯދުމަށްޓަކައި އަންނަ ހަފްތާގެ ފެށޭކޮޅު އެސްޓީއޯ މެދުވެރިކޮށް ރާއްޖެ އަށް އިތުރަށް ފިޔާ ގެނައުމުގެ މަސައްކަތް ކުރަމުންދާ ކަމަށްވެސް ހީނާ ވިދާޅުވިއެވެ.
ރާއްޖޭގެ ބާޒާރުގައި ފިޔާ ކިލޯއެއްގެ އަގު ދާދި ފަހުން 50 ރުފިޔާއަށް އަރާފައިއެވެ. އަދި ބާޒާރުމަތީގެ ބައެއް ފިހާރަތަކުން ފިޔާ ބަސްތާއެއްގެ އަގު 1000ރ އިން ވެސް މައްޗަށް ގޮއްސައިވެއެވެ.
އެގޮތުން ފިޔާ ލިބުން ދަތިވެފައިވަނީ ފިޔާ އެތެރެކުރާ ގައުމުތަކުން ޑިމާންޑާއި އެއްވަރަށް ފިޔާ ނުލިބޭތީކަމުގައި ވިޔަފާރިވެރިން ބުނެއެވެ.
