އިމިގްރޭޝަންގެ އޮފިޝަލުންކަމަށް ބުނެ އޮޅުވާލައިގެން ބަންގްލަދޭޝްގެ މީހެއްގެ އަތުން ފޭރުނު މައްސަލައިގައި ހައްޔަރު ކުރި މީހާގެ ބަންދަށް 10 ދުވަސް ޖަހައިފިއެވެ.
މިމަހުގެ 16 ވަނަ ދުވަހު އިމިގްރޭޝަންގެ ނަމުގައި ބިދޭސީން ދިރިއުޅޭ ތަނަކަށް 3 މީހަކު ވަދެ، މޯބައިލް ފޯނަކާއި 9000 ރުފިޔާ ފޭރިގަނެފައިވާ މައްސަލައެއްގައި ފުލުހުން ވަނީ ކޯޓު އަމުރެއްގެ ދަށުން ގ. ބެރުގެ، މުހައްމަދު ނަވީން (44އ) ހައްޔަރުކޮށްފައެވެ.
ފުލުހުން ވިދާޅުވީ މިމައްސަލަ އާއި ގުޅިގެން ފުލުހުން ހައްޔަރުކޮށްފައިވާ ނަވީންގެ ބަންދާއި މެދު ގޮތެއް ކަނޑައެޅުމަށް ކޯޓަށް ހާޒިރު ކުރުމުން ކްރިމިނަލް ކޯޓުން ވަނީ އޭނާގެ ބަންދަށް 10 ދުވަސް ޖަހާފައެވެ.
އިމިގްރޭޝަންގެ ނަމުގައި އޮޅުވާލައިގެން ފޭރުނު މިމައްސަލައިގައި އިތުރު ދެމީހަކު ހިމެނޭއިރު، މިމައްސަލަ އާއި ގުޅިގެން އަދި މިހާތަނަށް އިތުރު މީހަކު ހައްޔަރުކޮށްފައެއް ނުވެއެވެ.
