ބުރިޖު ހައިވޭއިން ހުޅުމާލެއަށް އަރާ ސަރަހައްދުގައި އެޗްޑީސީން މަގުބައްތި ހަރުކޮށް ދިއްލައިފިއެވެ.
އިއްޔެ ނިމުނު މި މަސައްކަތާއެކު، އެތައް އަހަރެއް ވަންދެން އަނދިރީގައި އޮތް މި ސަރަހައްދަށް އަލިކަން ގެނެވުނެވެ. މި ސަރަހައްދު އަނދިރިކޮށް އޮތުމުގެ ސަބަބުން ރޭގަނޑު ގަޑީގައި ދަތުރުކުރާ ފަރާތްތަކަށް ދިމާވަމުން އައި ގިނަ ދަތިތަކަށް ޙައްލެއް ލިބިގެންދާނެ ކަމަށް ބެލެވެއެވެ.
ސޯޝަލް މީޑިއާގައި އާންމުން މި ސަރަހައްދުގެ އަނދިރިކަމާ ގުޅޭ ޝަކުވާ ކުރަމުން އައިތާ އަހަރުތަކެއް ވެފައިވެއެވެ. ބައެއް ފަރާތްތަކުން ވަނީ މިދިޔަ ފަސް އަހަރު ތެރޭގައި މި ސަރަހައްދުގައި ބައްތި ނުޖެހުމާ ގުޅޭގޮތުން ކުރީގެ ސަރުކާރަށް ފާޑުކިޔާފައެވެ.
އެޗްޑީސީން މަޢުލޫމާތު ދޭގޮތުގައި، ހުޅުމާލެ ހިތްފަސޭހަ އަދި ރައްކާތެރި ތަނަކަށް ހެދުމަށް އެ ކުންފުނިން ދަނީ ގިނަގުނަ މަސައްކަތްތަކެއް ކުރަމުންނެވެ. މީގެ ތެރޭގައި މަގުތަކުގެ ރައްކާތެރިކަން ކަށަވަރުކުރުމަށްޓަކައި ހުޅުމާލޭގެ އެތެރޭގެ ބައެއް މަގުތަކުގެ ޓްރެފިކަށް ދާދި ފަހުން ގެނެވުނު ބަދަލުތައް ހިމެނެއެވެ.
