ޕްރޮސެކިއުޓާ ޖެނެރަލްގެ އޮފީހުން އަސްވާން މުޙައްމަދުގެ މައްޗަށް ދައުވާއުފުލާފައިވާ މައްސަލައެއްގައި ޤާނޫނާއި ޚިލާފަށް އޭނާ ބަންދުކުރުމަށް ފުލުހުން އެދިފައިވާ ކަމަށް ކްރިމިނަލް ކޯޓުން ބުނެފިއެވެ.
އަސްވާނު ހައްޔަރުކޮށްފައި ވަނީ މިދިޔަ އަހަރުގެ ސެޕްޓެމްބަރު ހަތަރެއްގައި މާލޭގެ ބޮޑުތަކުރުފާނު މަގަށްވާ ގޮތަށް ހުންނަ ޗީބޯ ކެފޭގެ ގޯޅި ތެރޭގައި ހިނގި މާރާމާރީއަކާ ގުޅިގެން އިންޓަޕޯލް ރެޑް ނޯޓިސް ނެރެގެންނެވެ. މިމައްސަލައިގައި އަސްވާނުގެ އިތުރުން، މުޙައްމަދު އަހްސަމު (26އ) އަދި މުޙައްމަދު ސިބްތު އަބްދުﷲ (19އ) ވަނީ ހައްޔަރުކޮށްފައިވެއެވެ.
ފުލުހުން ބުނެފައިވާ ގޮތުގައި މިތިން މީހުން ހައްޔަރުކޮށްފައި ވަނީ ޤައުމުން ފިލައިގެން އުޅެނިކޮށް ރެޑް ނޯޓިސް ނެރެގެން ތައިލެންޑުންނެވެ. އަދި މިތިން މީހުން ވެސް ހައްޔަރުކުރީ ތައިލެންޑުން އެމީހުން ރާއްޖެއަށް ފޮނުވާލުމުން ވެލާނާ އިންޓަނޭޝަނަލް އެއާޕޯޓުން ކަމަށް ވެސް ފުލުހުން ބުނެފައިވެއެވެ.
މިމައްސަލަ އާއި ގުޅިގެން އިއްޔެ ކްރިމިނަލް ކޯޓުން ނެރެފައިވާ ކޯޓު އަމުރެއްގައި ބަޔާންކޮށްފައި ވަނީ ޝަރީއަތްކުރުމާ ބެހޭ ޖިނާއީ އިޖުރާތުގެ 8 ވަނަ މާއްދާގެ (ނ) ގައި ދައުވާ ކުރުމާމެދު ގޮތެއް ނިންމުމަށް ޕީޖީގެ އޮފީހަށް ލިޔުންތައް ބަލައިގަނެފައިވާ މައްސަލަތަކުގައި ތުހުމަތު ކުރެވޭ މީހުންނާއި ދައުވާ އުފުލާފައިވާ މައްސަލަތަކުގައި ހިމެނޭ މީހުންގެ ބަންދާއިމެދު ގޮތްނިންމުމަށް އެދި ހުށަހަޅާނީ ޕީޖީ އޮފީހުން ކަމުގައި ބަޔާންކޮށްފައިވާ ކަމަށެވެ.
މިމައްސަލައިގައި އަސްވާން ހައްޔަރުކޮށް އޭނާގެ ބަންދާއިމެދު ގޮތެއް ކަނޑައެޅުމަށް ކޯޓަށް ހާޒިރު ކުރުމުން އޭނާގެ މައްޗަށް ތުހުމަތުކުރެވޭ މިންވަރަށް ހެކި ނެތްކަމަށް ބުނެ އަދި ބަންދުގައި ބަހައްޓަންޖެހޭ ސަބަބެއް ނެތްކަމަށް ބަޔާންކޮށް ދަށު ކޯޓުން އޭނާ ދޫކޮށްލައިފައިވާއިރު، ދަށު ކޯޓުގެ ނިންމުން ހައިކޯޓުގައި އިސްތިއުނާފު ކުރުމުން، ހައިކޯޓުން ވަނީ ކްރިމިނަލް ކޯޓުގެ އަމުރު ބާތިލްކޮށްފައެވެ. އަދި އަސްވާންގެ ބަންދާމެދު އަލުން ގޮތެއް ކަނޑައެޅުމަށް ހުށަހަޅައިފިނަމަ، އޭނާ ބަންދުގައި ބެހެއްޓުމާމެދު ގޮތެއް ކަނޑައެޅުމަށް ހައިކޯޓުން ވަނީ އަންގާފައެވެ.
މިއާއިއެކު ހައިކޯޓުގެ އަމުރާއި ގުޅިގެން އަސްވާންގެ ބަންދާއިމެދު ގޮތެއް ކަނޑައެޅުމަށް ހުށަހެޅުމަށް ބެލި އިރު، އޭނާ ރާއްޖެއިން ބޭރަށް ގޮސްފައި ވާތީ ބަންދާމެދު ގޮތެއް ކަނޑައެޅުމަށް އޭރު ހުށަހަޅާފައެއް ނުވެއެވެ. އެއަށްފަހު ފުލުހުން ވަނީ އޭނާ ހޯދުމަށް އިންޓަޕޯލުން ރެޑް ނޯޓިސް ނެރެފައެވެ.
މީގެއިތުރުން ޕީޖީން ވަނީ އަސްވާންގެ މައްޗަށް ތޫނު އެއްޗެހި ބޭނުންކޮށްގެން މާރާމާރީ ހިންގިކަމުގެ ދައުވާ އުފުލައި އެމައްސަލަ ކްރިމިނަލް ކޯޓަށް ހުށަހަޅާފައެވެ. އެހެންނަމަވެސް އަސްވާންގެ އެޑްރެސް ސާފު ނުވާތީވެ ކްރިމިނަލް ކޯޓުން ވަނީ މިދިޔަ އޯގަސްޓު މަހުގެ 20 ވަނަ ދުވަހު އެޑްރެސް ސާފުކުރުމަށް ފަހު އަލުން މައްސަލަ ކޯޓަށް ހުށަހެޅުމަށް އެދި މައްސަލަ އަނބުރާ ޕީޖީއަށް ފޮނުވައިފައެވެ.
މިމައްސަލައިގައި ފުލުހުން އަސްވާންގެ މައްޗަށް ތުހުމަތު ކުރެވޭ މާރާމާރީގެ މައްސަލައިގައި އޭނާގެ ބަންދާއިމެދު ގޮތެއް ކަނޑައެޅުމަށް ކޯޓަށް ހުށަހަޅައިފައި ވަނީ ރެޑް ނޯޓިސް ނެރެ އޭނާ ހައްޔަރު ކުރުމަށްފަހުގައެވެ. މިއާއިއެކު ކްރިމިނަލް ކޯޓުން ބުނެފައި ވަނީ އޭނާ މާރާމާރީ ހިންގި މައްސަލަ ޕީޖީގައި އޮއްވައި އެ މައްސަލައިގައި އޭނާގެ ބަންދާމެދު ގޮތެއް ނިންމުމަށް ފުލުހުންނަށް ހުށަނޭޅޭނެ ކަމަށެވެ.
“މި މައްސަލައަކީ ޕްރޮސެކިއުޓާ ޖެނެރަލް ބަލައިގަނެ، ކޯޓަށް ދައުވާ އުފުލައިފައިވާ މައްސަލައެއްކަން އެނގޭއިރު، މީނާގެ ބަންދާމެދު ގޮތެއް ނިންމުމަށް ފުލުހުން ހުށަހަޅައިފައި ވަނީ މި މާއްދާއާ ޚިލާފަށް ކަމުގައި ވާތީ، މީނާ ބަންދުން ދޫކޮށްލުމަށް ނިންމަމެވެ،” ކޯޓު އަމުރުގައި ބަޔާންކޮށްފައިވެއެވެ.
