ތަރައްޤީ ލިބުމަށް އެދޭ ނަމަ ރާއްޖެ ވާން ޖެހޭނީ ބައިނަލްއަޤްވާމީ މައިދާންތަކުގައި ބަސް ވިކޭ ޤައުމަކަށް ކަމުގައި ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ވިދާޅުވެއްޖެއެވެ.
އދ ގެ މެމްބަރު ޤައުމަކަށް ރާއްޖެ ވިތާ 59 އަހަރު ފުރުމާއި ގުޅިގެން ދެއްވި ޚިޠާބެއްގައި ރައީސް ވިދާޅުވީ، އދ ގެ ބަހުސްތަކުގައި ބައިވެރިވެ ރާއްޖޭގެ އަޑު އިއްވުމަކީ މުހިއްމު ކަމެއްކަމުގައެވެ.
އެގޮތުން ރާއްޖެއަށް ގެންނަން ބޭނުންވާ ތަރައްޤީ ހޯދުމަށް މަގު ކޮށޭނީ، ބައިނަލްއަޤްވާމީ މައިދާންތަކުގައި ރާއްޖެއަކީ ޤަދަރުލިބިގެންވާ އަދި ބަސް ވިކޭ ޤައުމެއްކަމުގައި ވެގެންކަމަށް ރައީސްގެ ޚިޠާބުގައި ވަނީ ވިދަޅުވެފައެވެ.
ރައީސް އިތުރަށް ވިދާޅުވީ އދ.އާ ރާއްޖެ ގުޅުނު މައިގަނޑު ސަބަބަކީ ހަމައެކަނި އެ ޤައުމެއްގެ ރައްޔިތުން ޤައުމުގެ މިނިވަންކަން ބަލައިގަތް ނަމަވެސް މިނިވަންކަން ދިފާއު ކުރުމުގައި ދަތިތައް ހުރުމުން ކަމަށާއި އަދި މިނިވަންކަން ބައިނަލްއަޤަވާމީ މަސްރަހުގައި ދިފާއުކޮށް ކުރިއެރުވޭނީ އެ މިނިވަންކަން ލިބިއްޖެކަން އެހެން ޤައުމުތަކަށް ވެސް އަންގައިގެން ކަމަށް ވާތީކަމަށް އެ މަނިކުފާނު ވިދާޅުވިއެވެ.
ކަނޑައެޅިގެންވާ ވަކި ސަރަހައްދެއްގެ މައްޗަށް އެ ގައުމެއްގެ ސިޔާދަތީ ބާރު އޮތްކަމާއި އެ ބާރު ފުރިހަމައަށް ހިނގާކަމުގެ މައުލޫމާތު އެހެން ގައުމުތަކަށް ވެސް ފޯރުކޮށްދީގެން. އެ ސިޔާދަތީ ބާރަށް އެހެން ގައުމުތަކުގެ އިހްތިރާމް ހޯދައިގެން – ރައީސް
އެގޮތުން ރާއްޖޭގެ މިނިވަންކަން ދިފާއުކުރުމަށް އެންމެ މުހިއްމު މަސައްކަތެއް ކުރެވެނީ އދ ގައިކަން ފާހަގަކުރައްވައި ރައީސް ވިދާޅުވީ، އދ.ގެ މެމްބަރުކަން ރާއްޖެއަށް އެހާ މުހިންމުވާ ސަބަބަކީ ވެސް އެއީ ކަމަށެވެ.
އެގޮތުން އދ ގައި ކުރެވޭ މަސައްކަތުގެ ދަތުރަކީ ދިވެހީން ފަޚުރުވެރިވާފަދަ ކާމިޔާބު ދަތުރެއް ކަމަށާއި މިއީ ނިކަމެތިކަމުން ފުދުންތެރިކަަމަށް ބިންގާއެޅި ދަތުރެއްގެ ގޮތުގައި ރައީސް ވަނީ ސިފަކުރައްވައިފައެވެ،
ހަމައެޔާއެކު ރާއްޖެ އދ.އާ ގުޅުމަކީ މޫސުމީ ބަދަލުތަކުގެ ވާހަަކަ ވެސް ދުނިޔޭގެ ސަމާލުކަމަށް ގެނެސްދިން މުހިއްމު ފިޔަވަޅެއްގެ ގޮތުގައި ރައީސް ފާހަގަކުރެއްވިއެވެ.
އެ މަނިކުފާނު ވިދާޅުވީ ފާއިތުވި 59 އަހަރު ދިވެހި ޑިޕްލޮމެޓުން އދ.ގައި ކުރިއެރުވީ ރާއްޖޭގެ މަސްލަހަތުކަމަށެވެ. ހަމައެއާއެކު އާ ސަރުކާރުން ވެރިކަމާ ހަވާލުވެ ފާއިތުވި 10 މަސް ތެރޭ ވެސް “އިތުރު ބާރު މިނެއްގައި” ކުރަމުން އަންނަނީ އެ މަސައްކަތް ކަމަށް ވިދާޅުވިއެވެ.
އެ މަނިކުފާނު ވިދާޅުވީ ރާއްޖެއިން މިހާރު އަންނަނީ އދ.ގެ އިކޮނޮމިކް އެންޑް ސޯޝަލް ކައުންސިލުގެ މެމްބަރުކަން ހޯދުމަށް ވާދަކުރަމުން ކަމަށެވެ.
