ބޭންކް އޮފް މޯލްޑިވްސް (ބީއެމްއެލް) އިން ދެ ލޯނުނަގަން ރަހުނު ކޮށްފައިވާ ދެގެއެއް ނީލަމުގައި ވިއްކާލަން އިއުލާންކޮށްފިއެވެ.
ބީއެމްއެލުން މިއަދު އާއްމުކޮށްފައިވާ އިއުލާނެއްގައި ވިއްކާލަން އިއުލާންކޮށްފައި ވަނީ މ. ބީޗްކޯނަރު (927.33 އަކަފޫޓު) އާއި މ.ނާއިންފަރުގެ (792 އަކަފޫޓު)ގެ ދެ ގޯއްޗެވެ.
ސިވިލް ކޯޓުން ވަނީ މިދިޔަ މަހުގެ 22 ވަނަ ދުވަހު ލޯނަށް ފައިސާ ނުދައްކާތީ އެ ދެގެ ވިއްކާލުމަށް އިއުލާންކޮށްފައެވެ.
ބީއެމްއެލުން ވަނީ އެ ގެތައް ގަންނަން ބޭނުންވާ ފަރާތްތަކުން އަގު ބަޔާންކޮށް ސިޓީ ހުށަހެޅުމުގެ ފުރުސަތު ހުޅުވާލައިފައެވެ.
އެގޮތުން މ. ބީޗްކޯނަރު ގަންނަން އެންމެ ދަށް އަގެއްގެ ގޮތުގައި ހުށަހެޅޭނީ 23.9 މިލިއަން ރުފިޔާ ކަމަށާއި މ. ނާއިންފަރުގެ ގަންނަން ހުށަހެޅޭނެ އެންމެ ދަށް އަގެއްގެ ގޮތުގައި ހުށަހެޅޭނީ 13 މިލިއަން ރުފިޔާކަމަށް ބީއެމްއެލުން ބުނެފައިވެއެވެ.
ބީއެމްއެލުން ހާމަކޮށްފައިވާ ގޮތުގައި އެ ގެތައް ގަންނަން ބޭނުންވާ ފަރާތްތަކުން އެ ފަރާތްތަކުގެ ހަ މަސް ދުވަހުގެ ބޭންކް ސްޓޭޓްމަންޓް ހުށަހަޅަން ޖެހޭނެއެވެ.
ލޯނު ނެގުމަށްޓަކައި ގޯތި ރަހުނުކޮށް ލޯނު ނުދެއްކުމުގެ ސަބަބުން ބީއެމްއެލުން ވަނީ އެގެތައް ވިއްކާލަން އިއުލާންކޮށްފައެވެ.
