މަގުތައް ކޮނުމުގެ ތެރޭގައި ދިމާވާ މައްސަލަތައް މަދުކުރުމަށްޓަކައި ސަލާމަތީ އުސޫލެއް ގާއިމުކޮށްފިއެވެ.
އައްޑޫގެ މަގުތައް ހަދަން ކުރިއަށް ގެންދާ މަސައްކަތުގެ ތެރެއިން ކޭބަލްތަކަކަށް ގެއްލުންވެގެން ކަރަންޓު ކެނޑުމުގެ މައްސަލަތަކެއް ދިމާވެފައި ވަނިކޮށް ފެނަކައިން ޤާއިމުކޮށްފައިވާ އުސޫލުގެ ދަށުން މަގު ކޮނުމުގެ މަސައްކަތް ކުރާއިރު ފެނަކައިގެ ޓެކްނިކަލް މުވައްޒަފުން ހުރުން ލާޒިމު ކުރެއެވެ.
މިކަމާއި ގުޅޭ ގޮތުން ފެނަކައިން ބުނީ މިއުސޫލުގެ ދަށުން ސަރުކާރު ކުންފުންޏެއް، ކޮންޓްރެކްޓް ކުރެވިގެން މަސައްކަތް ކުރާ ފަރާތެއް ނުވަތަ އާންމު ފަރުދަކަށްވިޔަސް އެއްވެސް ބޭނުމަކަށް މަގު ކޮނެ ތޮރުފާ ނުވަތަ މިފަދަ އެއްވެސް ކަމެއް ކުރާ ކަމުގައިވާނަމަ، އެކަން ކުރެވޭނީ އެ ރަށެއްގައި ޤާއިމުކޮށްފައިވާ ފެނަކަ އޮފީހުގެ ޓެކްނިކަލް މުވައްޒަފުންގެ ހާޒިރުގައި ކަމަށެވެ.
މިފަދަ ކަންކަމުގައި ކައުންސިލްތަކުގެ އެއްބާރުލުން މުހިއްމު ކަން ފާހަގަކޮށް ފެނަކައިން ބުނެފައި ވަނީ އަސާސީ ޚިދުމަތްތަކަކީ އެ ހިދުމަތްތައް މެދުކެނޑި ހިނގާ ކޮންމެ މިނެޓެއްގައިވެސް ރައްޔިތުންގެ ދިރިއުޅުމަށް އެތަކެއް ގެއްލުން ލިބޭ ކަންކަން ކަމަށާއި އެފަދަ ހާދިސާތަކުން ރައްކާތެރިވުމަށް އަޅަންޖެހޭ ފިޔަވަޅުތައް އެޅުމަކީ އެ ކުންފުނީގެ ޤާނޫނީ ޒިންމާއެއް ކަމަށެވެ.
ހަމައެޔާއެކު ރައްޔިތުންނަށް ދޭންޖެހޭ ޚިދުމަތްތަކުގެ ޔަޤީންކަން ދެމެހެއްޓުމަށްޓަކާ އެ ކުންފުނިން ޤާއިމުކޮށްފައިވާ އުސޫލުތަކުން ބޭރުން ކުރާ މަސައްކަތެއްގެ ތެރޭގައި ލިބޭ ގެއްލުމުގެ ބަދަލު ގާނޫނީ އިމުގެ ތެރެއިން ހޯދުމުގެ މަސައްކަތް ކުރާނެ ކަމަށްވެސް އެކުންފުނިން ބުނެފައިވެއެވެ.
